11 sentyabr kuni Uchtepa tumanidagi jamoat transporti bekatida 32 yoshli Evgeniya K.ga sababsiz badan shikastlari etkazgan Sirdaryo viloyatilik, muqaddam sudlangan 45 yoshli Toxir V.ga nisbatan qo`zg`atilgan jinoyat ishi bo`yicha tergov ishlari yakunlandi. Bu haqda IIBB xabar bermoqda.
Ilgari ma`lum qilinganidek, mazkur fakt bo`yicha Uchtepa tumani IIO FMB Tergov bo`limi tomonidan O`zbekiston Respublikasi Jinoyat kodeksining 277 moddasi 1 qismi (“Bezorilik”) bo`yicha jinoiy ish qo`zg`atilgan edi.
Ammo dastlabki tergov davomida barcha tafsilotlar o`rganilib, jabrlanuvchi, guvohlar va ayblanuvchining ko`rsatmalari inobatga olingach, ayblanuvchining hatti-harakatlari qayta baholandi. Natijada Toxir V.ga O`zbekiston Respublikasi Jinoyat kodeksining 277 moddasi 2 qismi “g” bandi (“Bezorilik”), hamda 112 moddasi 1 qismi (“O`ldirish yoki zo`rlik ishlatish bilan qo`rqitish”) bo`yicha ayblov taqdim etildi.
Dastlabki tergov davrida Toxir V.ga nisbatan qamoqa olish ehtiyot chorasi qo`llanilgan edi.
Hozirgi vaqtda jinoyat ishi sudga oshirilgan va ayblanuvchiga nisbatan jazo chorasi sud tomonidan belgilanadi.
