Madaniyat vaziri O.Nazarbekov ustoz san`atkorni samimiy qutlab, o`zbek milliy qo`shiqchilik san`ati rivojiga qo`shgan hissasi va uni targ`ib qilishdagi xizmatlarini yodga oldi. Bu haqda vazirlikning Matbuot xizmati xabar berdi.
Ta`kidlanishicha, Xayrulla Lutfullaev O`zbekiston xalq artisti Mukarrama Turg`unboeva boshchiligidagi “Bahor” ansambli bilan 30 yil davomida dunyoning 100 dan ortiq mamlakatlarida gastrol safarida bo`lib, o`zbek san`atini targ`ib qilish, milliy-mumtoz qo`shiqchilik yo`nalishini rivojlantirish, uni yangi ijrolar bilan boyitish borasida samarali faoliyat olib borgan.
“-- Sizning bu xizmatlaringiz davlatimiz tomonidan yuksak e`tirof etilib, “O`zbekistonda xizmat ko`rsatgan artist”, “O`zbekiston xalq artisti”, “Qoraqalpog`iston xalq artisti” unvonlari bilan taqdirlandi. Shuningdek, so`nggi yillarda “Mehnat shuhrati” ordeni hamda 1-darajali “Mehnat faxriysi” ko`krak nishoni bilan taqdirlanishingiz xalq va davlat oldidagi mehnatlaringizning nihoyatda qadrli ekanligidan dalolatdir. Madaniyat va san`atimizni rivojlantirish yo`lidagi jo`shqin ijodiy izlanishlaringiz hamisha mana shunday yuksak e`tiroflarga sazovor bo`laversin!” – dedi vazir.
Xayrulla Lutfullaevning 300 ga yaqin qo`shiqlari O`zbekiston milliy teleradiokompaniyasi fondidan joy olgan. Sohada ilmiy faoliyat bilan ham shug`ullanib, bir qator kitoblar muallifi hamdir. O`z yo`nalishida dosent, professor unvonlariga sazovor bo`lgan. Hozirda O`zbekiston davlat san`at va madaniyat institutining “Milliy qo`shiqchilik” kafedrasida talabalarga mumtoz lirik qo`shiqchilik yo`llaridan saboq berib kelmoqda.