12 nafar fuqarodan pasportini olib qo`yib, foxishalikka majbur qilgan ayol qo`lga olindi. Bu haqda IIV xuzuridagi Tergov departamenti xabar berdi.
Ushbu jinoiy xatti-harakatlar 2018 yilning avgust oyidan joriy yilning oktyabr oyiga qadar bo`lgan vaqt oralig`ida sodir bo`lgan. Jumladan 44 yoshli O.K. ismli ayol Samarqand shahrida joylashgan uylarning birida K.U., R.E., A.A., K.A., M.F., L.M., M.Sh., G.M., M.R., H.S., D.R. va Z.B., larga ijaraga boshpana berishni va`da qilib, ularning fuqarolik pasportlarini olib qo`ygan.
Keyin bu qizlarni tungi vaqtda Samarqand shahar Ro`dakiy ko`chasi va boshqa joylarida fohishalik bilan shug`ullanishlariga majburlagan. Aniqlanishicha, ayol ularni zo`rlik bilan ishlatib, har biridan kunlik 200.000 so`mdan 500.000 so`mgacha pullarni topish maqsadida foydalangan va ushbu yo`l bilan topilgan pullarni o`zida saqlab, shaxsiy ehtiyojlari uchun sarflagan.
Mazkur holat yuzasidan Samarqand shahri bo`yicha IIO FMB huzuridagi Tergov bo`linmasi tomonidan O.K., ga nisbatan O`zbekiston Respublikasi Jinoyat kodeksining 135-moddasi 2-qismi “B” bandi (odam savdosi) bilan jinoyat ishi qo`zg`atilgan bo`lib, o`tkazilgan tintuv tergov harakati davomida yuqoridagi shaxslarning fuqarolik pasportlari tegishli tartibda hujjatlashtirib olingan.
Hozirda O.K., jinoyat ishi doirasida JKning 135-moddasi 2-qismi “B,i” bandlari bilan ayblanuvchi tariqasida jalb qilinib, unga nisbatan “qamoqqa olish” ehtiyot chorasi tanlangan.
Jinoyat ishi yuzasidan tergov harakatlari davom etmoqda.
