O`zbekiston Respublikasi Prezidenti Shavkat Mirziyoevning Qashqadaryo viloyatiga tashrifi davomida Qarshi shahrida “O`zbekneftgaz” AJning mahalliylashtirish va kooperasiya paviloni ishga tushirildi. Davlatimiz rahbari mazkur pavilonga tashrif buyurib, unda namoyish etilgan eksponatlar bilan yaqindan tanishdi. Bu Bu haqda "O`zbekneftgaz" matbuot xizmati xabar berdi.
Davlatimiz rahbari Shavkat Mirziyoevga “O`zbekneftgaz” aksiyadorlik jamiyati Boshqaruvi raisi Mehriddin Abdullaev tomonidan mazkur pavilon, uni tashkil etishdan ko`zlangan maqsad hamda kelgusida uni takomillashtirish rejalari haqida axborot berildi.
Bugun tarmoqda ishlab chiqarilayotgan sanoat mahsulotlarining deyarli 50 foizidan ortig`i Qashqadaryo viloyatida faoliyat yuritayotgan sanoat ob`ektlari hissasiga to`g`ri keladi. Shu sababdan, tarmoq korxonalari uchun zarur bo`lgan mahsulotlar, butlovchi qism va materiallarni bevosita ushbu viloyat mahalliy ishlab chiqaruvchilardan xarid qilish asosiy maqsad qilib olingan.
Shundan kelib chiqib, joriy yilning fevral oyida Qarshi shahrida ilk marotaba “Neftgaz kooperasiya forumi” o`tkazilgan edi. Mazkur forumda 200 dan ortiq korxonalar ishtirok etib, natijada, umumiy qiymati 117 mlrd so`mlik 175 ta shartnoma imzolandi. Bugungi kunda umumiy qiymati 64 mlrd so`mlik 56 ta shartnoma bo`yicha to`lovlar amalga oshirilib, mahsulot va xizmat etkazib berilishi yakunlandi.
Ushbu tadbirning mantiqiy davomi sifatida Qarshi shahridagi Korxonalarni xususiylashtirish va sog`lomlashtirish klinikasida “O`zbekneftgaz” AJning mahalliylashtirish va kooperasiya paviloni tashkil etildi. Mazkur pavilonda mahalliy ishlab chiqaruvchilar bilan yaqin yillarda o`zlashtirilgan 100 ga yaqin mahsulotlar hamda ishlab chiqarish uchun taklif etilayotgan 500 ga yaqin mahsulot namunalari joylashtirilgan.
Mahsulotni o`zlashtirish istagini bildirgan tadbirkorlar uchun pavilonning o`zida operativ rejimda barcha zarur ma`lomotlar taqdim etish imkoniyati yaratilgan, shu jumladan, mahsulotning ko`rinishi, turi, markasi, texnik xususiyatlari, o`rtacha narxi, texnik talabnomasi shu erning o`zida taqdim etiladi.
Alohida monitorlarda “O`zbekneftgaz” AJning importdan xarid qilinayotgan va ishlab chiqarish uchun taklif etilayotgan mahsulotlari Onlayn ko`rgazmasi platformasi ham keltirilgan. Ushbu onlayn ko`rgazmada tarmoq ehtiyoji uchun zarur bo`lgan 8,5 mingdan ortiq turdagi mahsulotlar va xizmatlar korxonalar kesimida joylashtirilgan.
Bundan tashqari, pavilonda burg`ilash, qazib olish, qayta ishlash korxonalari texnologik qurilmalari haqida ko`rgazmali stendlar joylashtirilgan.
O`zbekiston Respublikasi Prezidenti Shavkat Mirziyoev pavilon bilan tanishar ekan, “O`zbekneftgaz” AJ tizimida mahalliy ishlab chiqaruvchilar bilan kooperasiya darajasini yanada kengaytirish, xaridlar jarayonlarini tizimlashtirish va raqamlashtirish ishlariga jiddiy urg`u berilish zarurligi yuzasidan topshiriqlar berdi.
Eslatib o`tamiz, “O`zbekneftgaz” AJning 2020 yil uchun Mahalliylashtirish dasturi doirasida 1,2 trln so`mlik 15 turdagi mahsulotlar ishlab chiqarilishi kutilmoqda. Xususan, piroliz gazolini, evro 4,5 dizel yoqilg`isi, bentonit kukuni, tomchilatib sug`orish tizimi va hokazo. Mahalliylashtirish va kooperasiya aloqalarini kengaytirish hisobiga import hajmini 247 mln dollarga qisqartirishga erishiladi.
Joriy yilning yanvar–oktyabr oylarida Respublika kooperasiya portali orqali 600 mlrd so`mdan ziyod mahsulotlar xarid qilinib, 246 ta mahalliy ishlab chiqaruvchilar bilan hamkorlik o`rnatildi (shundan 48 tasi yangi korxonalar). Bu yil kooperasiya asosida aktivlashtirilgan ko`mir (iqtisod 110 ming dollar), korroziyaga qarshi ingibitorlar (800 ming dollar), gaz bosimini o`lchagichlar (254 ming dollar), turli xil quvurlar va boshqalar ishlab chiqarilishi tashkil etildi.
