Avval xabar berganimizdek, ayni paytda prezident Shavkat Mirziyoev yoshlar forumida ishtirok etmoqda.
Shavkat Mirziyoev O`zbekiston yoshlari forumidagi nutqi davomida 2021 yildan eng yuqori ball bilan o`qishga kirgan 200 nafar talabaga maxsus Prezident granti berilishini ma`lum qildi.
«Kelgusi yilda 100 dan ziyod shahar va tumanlarimizda axborot texnologiyalarini chuqur o`rgatadigan zamonaviy o`quv markazlarini tashkil qilamiz. Yoshlarga xalqaro IT sertifikatlarini olish xarajatlarining 50 foizgacha bo`lgan qismi qoplab beriladi. Yaqin ikki yilda «Bir million dasturchi» loyihasi doirasida 300 ming nafar yoshlar kompyuter dasturlash asoslariga bepul o`qitiladi.
Keyingi yildan oliy ta`lim muassasalariga kirish imtihonlarida eng yuqori ball to`plagan 200 nafar yosh uchun Prezident granti joriy etiladi. Agar mavjud Prezident stipendiyasi faqat bir o`quv yili uchun mo`ljallangan bo`lsa, ushbu grant mablag`lari to`rt yil davomida to`lab boriladi.
Shuningdek, kelgusi o`quv yilidan boshlab respublikamizdagi xorijiy oliy o`quv yurtlarining bakalavriat bosqichi talabalari uchun ham Prezident va davlat stipendiyalari joriy etiladi».
