Bugun, 12 yanvar kuni "O`zbekkino" Milliy agentligi tashabbusi bilan o`tkazilayotgan Kino haftaligida Agentlik Jamoatchilik kengashi, Badiiy kengash a`zolari, kinorejissyorlar, prodyuserlar, ssenaristlar ishtirokida 2021 yilning yangi kinoloyihalari bo`yicha pitching tashkil etildi. Bu haqda "O`zbekkino" Milliy agentligi Axborot xizmati xabar bermoqda.
“Yangi O`zbekiston va Milliy kinematografiya: 2021 yil ishga tushiriladigan kinoloyihalar, 2022 yilning yangi g`oyalari” mavzusida tashkil etilgan davra suhbati yangi kinoloyihalarga bag`ishlandi. Unda Akbar Bekturdievning «Uzbechka», Jahongir Ahmedovning “Bo`ysunmas”, Dilmurod Masaidovning “Ayol qismati”, Mirmaqsud Ohunovning “So`nggi darvesh”, Abdusamat G`anievning “Yig`lamas” va shu kabi loyihalar taqdim etildi.
Davra suhbatida kinoloyihalarning mavzulari, janrlar xilma-xilligi, ko-produksiyalar, mutlaqo yangi formatdagi animasiyalar ishlab chiqarishga alohida e`tibor qaratildi. Shuningdek, rejissyorlar tomonidan tarixiy filmlar olish bo`yicha dekorasiyalar yaratish, ularni saqlab qolish, tarixiy rekvizitlarni agentlik tasarrufiga olish kabi qator masalalar ko`rib chiqildi.
Mazkur davra suhbatini o`tkazishdan maqsad, o`zbek milliy kino san`atiga yangi mavzu, yangi nomlar, o`zgacha uslub olib kirish va yangi chehralarni kashf qilishdir.
