Shaxmat dunyodagi eng qadimiy sport turlaridan biri sanaladi. Uning vatani Hindiston deb tan olingan bo`lsa-da, so`nggi tadqiqotlar ushbu aql-idrok sporti aslida O`rta Osiyo, xususan hozirgi O`zbekiston hududida paydo bo`lgan, degan farazlarni ilgari surmoqda.
Bu alohida mavzu, ammo shunisi aniqki shaxmat ommaviylik borasida ham sport turlari orasida etakchilardan biri hisobdanadi. Ayni paytda Xalqaro shaxmat federasiyasi, ya`ni FIDEga jahondagi 195ta milliy federasiya a`zo bo`lgan. Ommaviylik borasida ushbu aql-idrok sporti faqat engil atletikadan ortda qolishi mumkin.
Shaxmat musobaqalari orasida Butunjahon shaxmat Olimpiadasi eng nufuzli sanalib, mazkur sport anjumani mezbonligini qo`lga kiritish juda murakkab jarayondir. Yangi O`zbekiston hech ikkilanmasdan mana shunday yirik sport anjumanini o`zida qabul qilish uchun kurashga bel bog`ladi, deyiladi Jismoniy tarbiya va sport vazirligi Matbuot xizmati xabarida.
O`zbekiston shaxmat federasiyasida navbatdan tashqari hisobot-saylov konferensiyasi o`tkazilgan. Ushbu jarayonni kuzatib borish uchun yurtimizga FIDE prezidenti maslahatchisi Bereg Balgabaev tashrif buyurgan.
Yuqori martabali mehmon ishtirokida o`tkazilgan uchrashuvda 2026 yilgi Butunjahon shaxmat olimpiadasi musobaqasini yurtimizda qabul qilish masalasi muhokama qilingan.
Ikki tomon o`rtasidagi uchrashuvda so`nggi yillarda yurtimizda shaxmat sportini ommalashtirish borasida keng ko`lamli ishlar amalga oshirilayotgani, ayniqsa yaqinda imzolangan "Shaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari to`g`risida"gi Prezident qarori O`zbekistonda aql-idrok sporti rivojida yangi davrni boshlab berishi e`tirof etildi.
O`z navbatida janob Balgabaev yurtimiz shaxmatchilarining jahon arenalarida qozonayotgan yorqin g`alabalariga to`xtalib, bugun O`zbekiston shaxmat sportini rivojlantirishda nafaqat mintaqa, balki dunyo mamlakatlari uchun ham mayoq vazifasini o`tayotganligini ta`kidladi.
FIDE prezidenti maslahatchisi Butunjahon shaxmat Olimpiadasi mezbonligini qo`lga kiritish uchun barcha imkoniyatlar etarli ekani, faqat Olimpiadagacha yurtimizda bir nechta nufuzli musobaqalar hamda FIDE Kongressini o`tkazish maqsadga muvofiqligini bildirdi.
O`z navbatida Jismoniy tarbiya va sport vazirligi hamda MOQ mutasaddilari FIDE bilan chuqur hamkorlikni yo`lga qo`yishdan mamnun ekanliklarini ta`kidlashdi.
Ma`lumot uchun, FIDE prezidenti maslahatchisi Bereg Balgabaev yurtimizga tashrifi davomida poytaxtimizdagi Xalqaro shaxmat akademiyasida yaratilgan sharoitlar bilan ham tanishdi. Bu jarayonda mehmonga Jismoniy tarbiya va sport vazirligi rahbariyati hamrohlik qilgandi.
