Sirdaryo viloyatida yashovchi jinoiy guruh a`zolari tadbirkorlar va fuqarolarga zo`ravonlik o`tkazib, tovlamachilik va qo`rqitish yo`li bilan moddiy “ulush” undirgan. Bu haqda Sirdaryo viloyati IIB Axborot xizmati xabar qildi.
Xususan Guliston shahar, Guliston hamda Xovos tumanlarida istiqomat qiluvchi fuqarolarni jinoiy guruhga mablag` to`lamaganligi sababli doimiy qo`rqitish, ularga jismoniy tazyiq o`tkazish va boshqa turdagi jinoyatlarni sodir etib kelganlar. Jabr ko`rganlar esa hayotlari va oila a`zolarining xavfsizligini o`ylab huquq tartibod idoralariga murojaat qilmaganlar.
Joriy yilning 11 fevral kuni DXX Sirdaryo viloyat Boshqarmasi va viloyat IIB tomonidan o`tkazilgan hamkorlikdagi tezkor tadbirlar natijasida ushbu jinoiy guruhning noqonuniy faoliyatiga chek qo`yildi.
Xususan, Guliston shahri va tumanida yashovchi fuqarolar, 1983 yilda tug`ilgan “Maman” tahallusli A.M, 1994 yilda tug`ilgan M.A, 1968 yilda tug`ilgan X.E, 1992 yilda tug`ilgan Z.A, 1991 yilda tug`ilgan E.O. va 1984 yilda tug`ilgan E.S va 1994 yilda tug`ilgan X.Sh lar o`zaro til biriktirib, fuqarolarga transport xizmatini ko`rsatuvchi tadbirkorlar va fuqarolardan noqonuniy “ulush” olayotgan vaqtlarida ushlandilar.
Guruh a`zolarining yashash joylarida o`tkazilgan tintuv davomida jinoyatga aloqador daliliy ashyolar topilgan va ulardan jabr ko`rgan shaxslarning shikoyat va arizalari to`plangan.
Mazkur xolat yuzasidan Sirdaryo viloyat IIB Tergov Boshqarmasi tomonidan O`zbekiston Respublikasi JKning 104, 105, 165- moddalarining tegishli qismlari bilan jinoyat ishi qo`zg`atilib, jinoyatchilar O`zbekiston Respublikasi JPKning 221-moddasi asosida ushlangan. Xozirda tergov harakatlari davom etmoqda.