2021 yilning 15 yanvar kuni soat 10:30 larda noma`lum shaxs Toshkent shahri Chilonzor tumani 19-mavzesida joylashgan 44 yoshli Ilhom O.,ga tegishli xonadonga kirib, xonadon yotoqxonasidagi temir seyfni kalit tanlash yo`li bilan ochib, 7.000 AQSh dollari miqdoridagi pullar, 2.588.000 so`mlik qimmatbaho taqinchoqlari, ikki dona “Turon bank” tomonidan berilgan plastik kartalarini yashirin ravishda o`g`irlab, hodisa joyidan yashiringan.
Bu haqda IIV huzuridagi Tergov departamenti xabar berdi.
Olib borilgan tergovga qadar tekshiruv harakatlari natijasida, ushbu jinoyatni Ilhom O.,ning farzandlariga enagalik qiluvchi homilador 22 yoshli Mahbuba U., sodir etganligi aniqlangan.
Mazkur holat yuzasidan Chilonzor tumani bo`yicha IIO FMB huzuridagi Tergov bo`linmasi tomonidan Mahbuba U.,ga nisbatan O`zbekiston Respublikasi Jinoyat kodeksining 169-moddasi 3-qismi “a” bandi (o`g`rilik) bilan jinoyat ishi qo`zg`atilib, gumon qilinuvchi tariqasida jalb qilingan.
Hozirda tergov harakatlari davom etmoqda.
Eslatib o`tamiz, Navoiy viloyati Karmana tumanida ikki nafar qizaloqning onasi, 3-farzandiga xomilador ayol o`zi ishlagan xonadonning mehmonxonasiga kirib seyfda turgan 69 mln 300 ming so`mni o`g`irlab ketgan edi.
