Poytaxtimizdagi Yoshlar ijod saroyida O`zbekiston Respublikasi mudofaasiga ko`maklashuvchi «Vatanparvar» tashkiloti markaziy kengashi va Yoshlar ishlari agentligi rahbarlarining respublikamiz yoshlariga qo`shma murojaatnomasi e`lon qilindi.
Dastlab ijod saroyi hovlisida «Vatanparvar» tashkiloti tomonidan haydovchilar tayyorlashda foydalaniladigan avtomototransport vositalari va sport jihozlarining namoyishi yig`ilganlar e`tiboriga havola etildi. Saroy foyesida esa texnik va amaliy sport turlari bo`yicha ko`rgazma hamda sport murabbiylarining mahorat darslari tashkil etildi.
Shundan so`ng yalpi yig`ilishda ikki tashkilot o`rtasida yoshlar masalalari sohasida o`zaro hamkorlik memorandumi imzolandi.
Murojaatda qayd etilishicha, joriy yilning 1 aprelidan respublikamiz miqyosida «Yoshlar daftari»ga kiritilgan hamda muhtoj oilalar farzandlari «Vatanparvar» tashkilotining o`quv muassasalarida «VS» toifali haydovchilarni tayyorlash bo`yicha bepul o`qitilishi yo`lga qo`yiladi. Mazkur loyiha asosida o`qishga qabul qilinuvchilar ro`yxati bandlik va mehnat munosabatlari vazirligi tomonidan taqdim etiladi.
Qo`shma murojaat yakunida avtosport, aviamodel, raketamodel, kemamodel, motokross, radiosport, karting, triatlon, yozgi biatlon, pnevmatik miltiqdan o`q otish bo`yicha 2020 yilning eng yaxshi sportchilari hamda «Vatanparvar» tashkilotining eng ilg`or murabbiylari sertifikat va esdalik sovg`alar bilan taqdirlandi.
