Ijtimoiy tarmoqlarda Toshkent metropolitenining Sergeli yo`nalishidagi "3-Bekat" stansiyasida vaqtini ko`rsatuvchi soat darchasida harakatlanuvchi satrda nojo`ya gap aks ettirilgan video tarqalmoqda.
“Toshkent metropoliteni” UK ma`lum qilinishicha, ushbu hodisa bo`yicha ichki xizmat tekshiruvi o`tkazilgan. Unga ko`ra, 12 aprel kuni soat 16:40da ushbu vaqtini ko`rsatuvchi soat mexanizmiga xakerlar tomonidan kiberhujum (buzib kirish) sodir bo`lganligi aniqlandi. Ushbu darcha elektron tizimli bo`lib, Wi-Fi orqali boshqariladi. Hujumchilar soatga o`rnatilgan parolni buzib, unga nojo`ya gapni harakatlanuvchi satrga joylashtirgan. Ta`kidlash joiz, mazkur gap 4 daqiqa ichida olib tashlandi. Huquqni muhofaza qilish organlari tomonidan aybdorlar qidirmoqda va ularga nisbatan tegishli choralar ko`riladi.
“Toshkent metropoliteni” UK rahbariyati telekommunikasiya tarmog`iga noqonuniy (sanksiyasiz) ulanishdan ogohlantiradi va bunga jinoiy javobgarlik belgilanganligini eslatib o`tmoqda.