Keyingi paytlarda ijtimoiy tarmoqlarda aholining avtomobilning kabinasi(saloni)ni suv bosayotganligi haqidagi shikoyatlari va murojaatlari paydo bo`la boshladi. Tarqalgan video tasvirlarda suv salon ichiga tushib, avtomobil gilamchalari ostida to`plangani aks etgan. Holat yuzasidan UzAuto Motors AJ rasmiy munosabat bildirdi.
Aslida yangi avtomobil salonida suv to`planishining asosiy sababi, avtomobil kuzovining texnik teshiklarining demontaj qilinganligidadir.
Avtomobil modeliga qarab, texnik teshiklar transport vositasining pastki qismida yoki dvigatel panelida joylashgan bo`ladi. Ularning har biri maxsus qopqoqlar bilan mahkamlangan.
Ko`p hollarda texnik teshiklarning nosozligi demontaj vaqtida, ya`ni tashqi qurilmalar masalan, videoregistratorlarni o`rnatish jarayonida yuzaga keladi. Tashqi qurilmalarni o`rnatishda ishonchli bo`lmagan yoki etarli malakaga ega bo`lmagan ayrim noprofessional mutaxassislar tomonidan qopqoqlarga yoka teshiklarga zarar etkazilishi, ularni joylashtirishni unutib qo`yishlari mumkin. Natijada esa tana zichligi jismning germetikligi buziladi. Bu esa salon ichki qismiga suvning osonlik bilan kirishiga olib keladi.
Yangi avtomobilingizda bu kabi tushunmovchiliklarga yo`l qo`ymaslik va muammoni bartaraf etish maqsadida, qo`shimcha muammolarni yuzaga chiqarmaslik uchun biz faqat sertifikatlangan xizmat ko`rsatish markazlariga murojaat qilishingizni maslahat beramiz.
“UzAuto Motors” uchun har bir mijozning xavfsizligi va qulayligi muhim hisoblanadi. Biz ehtimoliy shikastlanishlar haqidagi foto - va video- axborotni taqdim etayotgan faollarga minnatdorchilik bildiramiz.
