Ijtimoiy tarmoqlarda “Paxtachi tumanida YPX xodimlari bir odamni avtomobilida urib olib ketti” sarlavhasi ostida videolavha tarqaldi.
Holat yuzasidan Samarqand viloyati IIB Axborot xizmati ma`lumot berdi.
Ma`lum qilinishicha, 2021 yil 26 aprel kuni soat 18:30 larda Samarqand viloyati IIB YHXB 4-otryad xodimlari Paxtachi tumani hududidan o`tuvchi “Mirkan” MFYdagi ichki yo`lda xizmat olib borayotgan vaqtida, shu yo`nalishda harakatlanib kelayotgan “Damas” rusumli transport vositasi YPX xodimlarini ko`rib, yo`nalishni keskin o`zgartirib, orqaga harakatlangan.
Bu holat YPX inspektorlarida shubha uyg`otib, xodimlar o`zlariga biriktirilgan patrul avtomashinasida transport vositasini kuzatib borib, to`xtatish choralarini ko`rgan.
Transport vositasini hujjatlarini ko`zdan kechirish vaqtida, haydovchi spirtli ichimlik ist`emol qilganlikda gumonlanib, narkologiya dispanseriga olib borilayotganda, haydovchi xodimlarga qarshilik ko`rsatib, nojo`ya so`zlar bilan haqorat qilgan. Tibbiy ko`rik natijasiga ko`ra ushbu haydovchida mastlik holati aniqlanib, unga nisbatan ma`muriy bayonnoma rasmiylashtirilib, transport vositasi vaqtinchalik saqlash uchun jarima maydonchasiga qo`yilgan.
Xodimlarning harakatlarida xizmat intizomi va qonun buzilish holatlari bor yoki yo`qligini aniqlash maqsadida xizmat tekshiruvi o`tkaziladi, deyilgan rasmiy munosabatda.
