Xalq deputatlari Namangan shahar kengashining navbatdan tashqari sessiyasida Yangi Namangan tumaniga hokim tayinlandi. Bu haqda viloyat hokimligi axborot xizmati xabar berdi.
Xabarga ko`ra, sessiyada Namangan viloyatining Namangan shahri tarkibida Yangi Namangan tumanini tashkil etish bo`yicha masala ko`rilgan. Viloyat hokimi Shavkat Abdurazzaqov Yangi Namangan tumani hokimligiga shu paytga qadar Namangan viloyati hokimligining sanoatni rivojlantirish, kapital qurilish, kommunikasiyalar va kommunal xo`jalik masalalari kotibiyati mudiri bo`lib ishlab kelgan Jobir Abdullaev nomzodini taklif qilgan.
Qayd etilishicha, deputatlar va faollar nomzod yuzasidan fikr-mulohazalarini bildirgan. Nomzod ular tomonidan ma`qullangan. Jobir Abdullaev 1984 yilda Namangan shahrida tug`ilgan. 2005 yilda Namangan muhandislik pedagogika instituti, 2008 yilda Namangan muhandislik pedagogika institutini tamomlagan.
U 2008–2019 yillar davomida «Namangan elektr tarmoqlari» ochiq aksiyadorlik jamiyatida turli mas`ul lavozimlarda mehnat qilgan. 2019–2020 yillarda Namangan shahar hokimining sanoatni rivojlantirish, kapital qurilish, kommunikasiyalar, kommunal xo`jalik masalalari bo`yicha o`rinbosari vazifasini bajaruvchi bo`lib ishlagan. Jobir Abdullaev 2020 yildan to shu kunga qadar Namangan viloyati hokimligining sanoatni rivojlantirish, kapital qurilish, kommunikasiyalar va kommunal xo`jalik masalalari kotibiyati mudiri sifatida faoliyat yuritib kelgan.
