Shavkat Mirziyoev Qibrayda barpo etilayotgan bog` hududiga tashrif buyudi (foto)

Prezident Shavkat Mirziyoev 1 may kuni Toshkent viloyatining Qibray tumanida barpo etilayotgan bog` hududiga tashrif buyurdi. Bu haqda Prezident Matbuot kotibi xabar berdi.

Daraxtzorlar – yurtga chiroy beradigan, hayot sifatini oshiradigan manbalardan. Shu maqsadda shahar va tumanlarimizda yangi bog` va sayilgohlar tashkil etilmoqda. Bunday “yashil hududlar” so`nggi yillarda ko`plab qurilishlar bo`lib, tobora rivojlanib borayotgan Toshkent shahri uchun, ayniqsa, muhim.

Davlatimiz rahbari tashabbusi bilan poytaxtimiz yaqinida ulkan manzarali bog` barpo etilmoqda. 25 fevral kuni ushbu bog` loyihasi muhokama qilingan edi. Bugun unga ilk ko`chatlar ekildi.

Shu munosabat bilan bu erga parlament va hukumat a`zolari, Toshkent shahri jamoatchiligi, nuroniylar, ilm-fan va san`at vakillari, sportchilar, yoshlar yig`ildi.

– Bugungi muborak Ramazon kunlarida sizlar bilan ko`rishib turganimdan xursandman. Xalqimiz uchun munosib sharoitlar yaratish bo`yicha ko`p ishlarni boshlaganmiz. Xudo xohlasa, mana shu bahavo joyda 104 gektarlik bog` barpo etmoqchimiz. Bu xayrli ishning boshlanishi hozirgi ulug` ayyom kunlariga to`g`ri kelgani ham xosiyatli, deb o`ylayman, – dedi Shavkat Mirziyoev.

Yangi bog` nafaqat manzarasi, landshafti, balki mazmuni bilan ham alohida e`tiborga molik. Bog`ning umumiy ko`rinishi xuddi ulkan daraxtning beshta shoxi shaklida bo`ladi. Bu Harakatlar strategiyasining beshta ustuvor yo`nalishini ifodalaydi.

Bog`ni oddiy park emas, eng avvalo, yuksak madaniyat va ma`naviyat maskaniga aylantirish maqsad qilingan. Bu erda odamlar tabiat qo`ynida osuda dam oladigan so`lim hududlar yaratiladi. Kashtan, eman, chinor, lola, lipa bog`lari barpo etilib, noyob manzarali daraxtlar, butalar va gullar ekiladi. Sun`iy ko`l, sport maydonlari, bolalar o`yingohlari, favvoralar quriladi.

Mustaqilligimizning 30 yilligiga bag`ishlangan Istiqlol majmuasi ham shu erda barpo etiladi.

Prezidentimiz bu majmuaning tarixiy-g`oyaviy ahamiyatini ta`kidladi.

- Bu yil mustaqilligimizning 30 yilligini nishonlaymiz. Lekin davlatchiligimiz 3 ming yillik. Bu ana shu buyuk tarixni ko`rsatadigan majmua bo`ladi. Bu erga kelgan yoshlarimiz, chet ellik mehmonlar ham shuni anglaydigan dalillar aks ettiriladi, - dedi davlatimiz rahbari.

Prezident Shavkat Mirziyoev bu bog` O`zbekistonning yangi qiyofasini, ulkan salohiyatini, ko`pmillatli xalqimizning jipsligi va ahilligini namoyon etadigan majmua bo`lishi kerakligini ta`kidladi. Shuni hisobga olib, bu muhtasham boqqa “Yangi O`zbekiston” deb nom berishni taklif etdi. Yig`ilganlar bu taklifni qo`llab-quvvatladi.

Davlatimiz rahbari jamoatchilik bilan birga yangi boqqa ko`chatlar o`tqazdi.

Avval xabar qilinganidek, mazkur bog`ning yonida Olimpiya shaharchasi ham bunyod etiladi.