O`zbek kinoijodkorlari delegasiyasining Tojikiston Respublikasiga ijodiy safari bugun, 22 may kuni o`z nihoyasiga etdi. Bu haqda Kinematografiya agentligi Axborot xizmati xabar qildi.
Avvalroq 19-22 may kunlari qo`shni respublika Tojikistonda “O`zbek kinosi kunlari” bo`lib o`tishi haqida ma`lum qilingan edi. Shu munosabat bilan taniqli kinoijodkorlar va jurnalistlardan iborat delegasiya tuzilib, delegasiya a`zolari uch kun davomida Tojikistonda ijodiy safarda bo`lishdi.
Tashrifning ilk kuni, 19 may O`zbekistonlik hay`at a`zolarini «Tojikfilm» davlat muassasasi direktori Mahmasaid Shohiyon boshchiligidagi tojik kinoijodkorlari kutib olishdi. Shu kuni delegasiya Tojikiston Ommaviy axborot vositalari akademiyasida bo`lib, matbuot anjumanida ishtirok etdi. Anjumandan so`ng o`zbekistonlik kinoijodkorlar Abu Abdulloh Ro`dakiy nomidagi milliy kutubxonaga tashrif buyurishdi. Mazkur kutubxonada uch yarim million nusxadan ortiq turli tillardagi kitoblar, gazeta va jurnallar saqlanmoqda.
Shuningdek, tashrif davomida o`zbekistonlik mehmonlar Dushanbe shahridagi Alisher Navoiy bog`iga ham tashrif buyurib, u erda hazrat Navoiyning she`rlaridan namunalar o`qildi. Mazkur bog` 2018 yil ochilgan bo`lib, uning ochilishida ikki davlat rahbari Shavkat Mirziyoev va Emomali Rahmon ishtirok etishgan.
20 may kuni o`zbekistonlik kino ustalari Hisor shahriga tashrif buyurib, shaharning diqqatga sazovor maskanlari, tarixiy obidalari bilan tanishdilar. Yana shu kun inoijodkorlarning Tojikiston Milliy muzeyiga tashrifi ham mazmunli o`tdi. Muzeyda “O`zbekiston madaniy merosi dunyo to`plamlarida” kitob-albomlarining taqdimoti ham o`tkazildi. Taqdimotdan keyin mehmonlar tojik kinematografiyasining etuk namoyandalaridan biri Boris Kimyogarov (1920-1979) qabrini ziyorat qilishdi.
21 may kuni O`zbekiston delegasiyasi Vahdat shahrida ham kino muxlislari katta xursandchilik va tantana bilan kutib olishdi. Vahdat madaniyat saroyida o`tkazilgan uchrashuv so`ngida rejissyor Ayub Shaxobiddinov suratga olgan “Rangsiz tushlar” badiiy filmi namoyish qilindi. Shu kuni Dushanbe shahridagi “Zebuniso” kinoteatrida o`zbek va tojik kinoijodkorlarining uchrashuvi o`tkazildi.
Uchrashuv nihoyasida O`zbekiston Kinemtaografiya agentligi bosh direktori F.Abduxoliqov hamda “Tojikfilm” Davlat muassasasi raisi M.Shohiyon ikki tomonlama hamkorlik bo`yicha memorandum imzolashdi. Shu kuni “Tojikfilm” Davlat muassasasi tomonidan suratga olingan “Suv bolasi” (“Bachai obiy”) filmi ham tomoshabinlar e`tiboriga havola qilindi.
Shu bilan “Tojikistonda O`zbekiston kinosi kunlari” o`z nihoyasiga etdi. Uch kun davomida Tojikistonning bir qator shahar va tumanlarida tomoshabinlarga “Ilhaq”, “Rangsiz tushlar”, “Kelinlar qo`zg`oloni”, “Hamkorlik bo`yicha navbatchi”, “Xalq yuragi”, “Sirli sandiq” singari badiiy, hujjatli va animasion filmlar namoyish qilindi. O`zbekistonlik kinoijodkorlar 22 may kuni Vatanimizga qaytib kelishdi.
