2021 yil 11 iyun, soat 11:50da 38-yo`nalishda harakatlanayotgan poezdning 3-vagonida shubhali qarovsiz narsa tashlab ketildi va bu haqida poezd mashinistiga xabar berildi. Ichki ishlar vazirligi va “Toshkent metropoliteni” o`rtasida o`zaro kelishilgan holda tasdiqlangan yo`riqnomaga asosan, yo`lovchilar va poezdlar harakati xavfsizligini ta`minlash maqsadida yo`lovchilar “Kosmonavtlar” bekatida poezddan tushirildi. Bu haqda "Toshkent metropoliteni" UK xabar berdi.
Poezddagi shubhali qarovsiz buyumni tekshirish uchun poezd yo`lovchilarsiz elektrodepoda joylashgan maxsus tekshirish punktiga yuborildi.
Hozirgi vaqtda barcha yo`nalishlarda poezdlar jadval asosida harakatlanishda davom etmoqda.
"Yo`lovchilarni tashish bilan bog`liq faoliyat yurituvchi metropoliten korxonasini bila turib ijtimoiy tarmoqlar orqali obro`sizlantirish maqsadida, asoslanmagan yolg`on xabarlar, foto va videolavhalar, uydirmalarni tarqatish, shuningdek nashr qilish yoki boshqa usulda ko`paytirilgan tarzda telekommunikasiya tarmoqlarida yoki Internet tarmog`ida joylashtirish orqali hamda g`arazgo`ylik yoki boshqa past niyatlarda tuhmat qilish bilan bog`liq qonunbuzarlikni qasddan sodir qilgan shaxslar qonunchilikda belgilangan javobgarlikka tortilishini eslatib o`tamiz",– deyiladi korxona xabarida.
