Kinematografiya agentligi, Haydar Aliev nomidagi Ozarbayjon Madaniyat markazi bilan hamkorlikda “First art media” studiyasi tomonidan “Maqsud Shayxzoda. Erkka intilgan shoir” hujjatli filmining Ozarbayjon Respublikasidagi s`yomkalari boshlandi. Bu haqda Kinematografiya agentligining Matbuot xizmati ma`lum qildi.
Ssenariy muallifi va rejissyor Nurillo Narzullaev, operator Muzaffar Yusupov, prodyuser Tohirbek Qo`chqorbekov.
Hozirda ijodiy guruh Jafar Jabborli nomidagi “Ozarbayjonfilm” kinostudiyasi direktori Fariz Ahmedov, Haydar Aliev nomidagi Ozarbayjon Madaniyat markazi direktori, Ozarbayjonning O`zbekistondagi elchixonasi birinchi kotibi Samir Abbasov hamda Ozarbayjonning “AzTV” milliy telekanali bilan birgalikda eski shahar majmuasi, muzey va kutubxonalarda suratga olish ishlarini olib bormoqda.
“Maqsud Shayxzoda: Erkka intilgan shoir” hujjatli filmida badiiy sahnalar ham bo`lib, o`zbek va ozarbayjon aktyorlari ishtirok etadi. Film voqealarining asosiy qismi Ozarbayjon Respublikasida suratga olinishi rejalashtirilgan.
