Kuni kecha O`zbekiston Kinematografiya agentligi Bosh direktori Firdavs Abduxoliqov Tojikistonning O`zbekistondagi favqulodda va muxtor elchisi Abdujabbor Rahmonzoda bilan uchrashuv o`tkazdi.
Uchrashuvda elchi janoblari bugungi kundagi o`zbek kinematografiyasining yutuqlari, Tojikistonda o`zbek kino kunlari yuqori darajada o`tkazilganligi, tojik xalqi tomonidan filmlar o`zgacha zavq bilan tomosha qilinganligi haqida fikrlar bildirib, Kinematografiya agentligi Bosh direktoriga o`z faoliyatida muvaffaqiyatlar tiladi.
10-11 iyun kunlari O`zbekiston Respublikasi Prezidenti Shavkat Mirziyoevning Tojikistonga tashrifi asnosida o`zbek kinoustalari tomonidan yaratilgan “Ilhaq” badiiy filmi, “Abdurahmon Jomiy”, “Yagona osmon ostida”, “Xalq yuragi” hujjatli filmlari namoyish qilindi. Mazkur filmlar tojik kino muxlislari tomonidan samimiy qabul qilindi. Muhtaram Prezidentimiz ushbu tashrif asnosida Tojikistonda o`tkazilgan o`zbek kinosi kunlari muvaffaqiyatli o`tganini qayd etib, buyuk ajdodlarimiz – Alisher Navoiy va Abdurahmon Jomiy do`stligi haqida hamkorlikda badiiy film yaratish vaqti kelganini ta`kidladi. Aytib o`tish lozimki, bu ikki buyuk siymolarimiz jahon adabiyotida ilm-ma`rifatga qo`shgan hissasi bilan alohida o`rin tutadi. Shu jihatdan bu ulug` siymolar haqida yaratilajak tarixiy kinokartina ikki mamlakat uchun ham ayni muddaodir. Bu shubhasiz, azaliy o`zbek va tojik qardoshlik rishtalari va an`analari davom etib kelayotganidan dalolat berib, xalqlarimiz o`rtasidagi madaniy aloqalarning rivojlanishiga xizmat qiladi.
O`z navbatida, Firdavs Abduxoliqov ana shu tashrif chog`ida ikki mamlakat kinoijodkorlari oldiga qo`yilgan mas`uliyatli vazifalar xususida so`z yuritib, elchi janoblariga o`zbek kinosi haqidagi iliq munosabatlari uchun o`z minnatdorchiligini bildirdi.
– Mamlakatlarimiz o`rtasidagi ijodiy hamkorlik kinematografiya sohasida o`zaro tajriba almashish, mahoratli kinoijodkorlarni kashf etish va yangi filmlar suratga olishga zamin yaratadi, - dedi Firdavs Abduxoliqov. – Muhtaram Prezidentimiz taklifiga binoan Alisher Navoiy va Abdurahmon Jomiy haqida tarixiy badiiy filmni yaratish buyicha Kinematografiya agentligi qoshida ikkala davlat ziyolilaridan tashkil topgan “Ijodiy guruh”ni shakllantirdik. Endilikda muntazam ravishda videokonferensiyalar o`tkazilib, hamkorlik yuzasidan muzokaralar olib boriladi. Muvaffaqiyatli film yaratishimiz uchun bizga albatta kuchli ssenaristlar, rejissyorlar, bastakorlar, dizaynerlar va umuman film uchun munosib Ijodiy guruhning katta mehnati talab etiladi. Shuningdek, madaniy aloqalarimizning mustahkamlanishida O`zbekistonda tojik kinosi kunlari muntazam ravishda o`tkazilishi tarafdorimiz. Joriy yilning may oyida Tojikistonga ijodiy safarimiz davomida “Tojikfilm” bilan hamkorlik bo`yicha memorandum imzolagan edik. Tojikistonlik kinoijodkorlar bilan hamkorlikda ko-produksiyalar ishlab chiqarishni boshlab yubordik. Bu borada bizga O`zbekiston va Tojikiston kinematografiyasini rivojlantirish bo`yicha ikki mamlakatning taniqli kino arboblaridan tashkil topgan Idoralararo qo`shma hamkorlik kengashi katta yordam beradi.
– “Tojikfilm” kinostudiyasi va O`zbekiston Kinematografiya agentligi hamkorlikda filmlar yaratishi ikkala davlat, ikki xalq, tomoshabinlar va kinoijodkorlar uchun ham foydadir, – dedi Abdujabbor Rahmonzoda. – Chunki biz ildizi birlashib ketgan ikkita xalqmiz. Ushbu film haqida Konsepsiya ishlab chiqishga, uni amalda tadbiq etishni kechiktirmaslik uchun "Tojikfilm" va Kinematografiya agentligi o`rtasida mustahkam ko`prik bo`lishga va doimiy hamkorlikka tayyormiz.
Uchrashuvda bu yirik kino-loyihadan tashqari, o`zbek va tojik kinoijodkorlari hamkorligida suratga olinishi kutilayotgan “Notanish yulduz” hamda “Toshlar va suv” kartinalari, shuningdek joriy yilning iyul oyi oxirida O`zbekistonda “Tojikiston kinosi kunlari”ni o`tkazish bo`yicha ham suhbatlashildi.
