Куни кеча Ўзбекистон Кинематография агентлиги Бош директори Фирдавс Абдухолиқов Тожикистоннинг Ўзбекистондаги фавқулодда ва мухтор элчиси Абдужаббор Раҳмонзода билан учрашув ўтказди.
Учрашувда элчи жаноблари бугунги кундаги ўзбек кинематографиясининг ютуқлари, Тожикистонда ўзбек кино кунлари юқори даражада ўтказилганлиги, тожик халқи томонидан фильмлар ўзгача завқ билан томоша қилинганлиги ҳақида фикрлар билдириб, Кинематография агентлиги Бош директорига ўз фаолиятида муваффақиятлар тилади.
10-11 июнь кунлари Ўзбекистон Республикаси Президенти Шавкат Мирзиёевнинг Тожикистонга ташрифи асносида ўзбек киноусталари томонидан яратилган “Илҳақ” бадиий фильми, “Абдураҳмон Жомий”, “Ягона осмон остида”, “Халқ юраги” ҳужжатли фильмлари намойиш қилинди. Мазкур фильмлар тожик кино мухлислари томонидан самимий қабул қилинди. Муҳтарам Президентимиз ушбу ташриф асносида Тожикистонда ўтказилган ўзбек киноси кунлари муваффақиятли ўтганини қайд этиб, буюк аждодларимиз – Алишер Навоий ва Абдураҳмон Жомий дўстлиги ҳақида ҳамкорликда бадиий фильм яратиш вақти келганини таъкидлади. Айтиб ўтиш лозимки, бу икки буюк сиймоларимиз жаҳон адабиётида илм-маърифатга қўшган ҳиссаси билан алоҳида ўрин тутади. Шу жиҳатдан бу улуғ сиймолар ҳақида яратилажак тарихий кинокартина икки мамлакат учун ҳам айни муддаодир. Бу шубҳасиз, азалий ўзбек ва тожик қардошлик ришталари ва анъаналари давом этиб келаётганидан далолат бериб, халқларимиз ўртасидаги маданий алоқаларнинг ривожланишига хизмат қилади.
Ўз навбатида, Фирдавс Абдухолиқов ана шу ташриф чоғида икки мамлакат киноижодкорлари олдига қўйилган масъулиятли вазифалар хусусида сўз юритиб, элчи жанобларига ўзбек киноси ҳақидаги илиқ муносабатлари учун ўз миннатдорчилигини билдирди.
– Мамлакатларимиз ўртасидаги ижодий ҳамкорлик кинeмaтография соҳасида ўзаро тажриба алмашиш, маҳоратли киноижодкорларни кашф этиш ва янги фильмлар суратга олишга замин яратади, - деди Фирдавс Абдухолиқов. – Муҳтарам Президентимиз таклифига биноан Алишер Навоий ва Абдураҳмон Жомий ҳақида тарихий бадиий фильмни яратиш буйича Кинематография агентлиги қошида иккала давлат зиёлиларидан ташкил топган “Ижодий гуруҳ”ни шакллантирдик. Эндиликда мунтазам равишда видеоконференциялар ўтказилиб, ҳамкорлик юзасидан музокаралар олиб борилади. Муваффақиятли фильм яратишимиз учун бизга албатта кучли сценаристлар, режиссёрлар, бастакорлар, дизайнерлар ва умуман фильм учун муносиб Ижодий гуруҳнинг катта меҳнати талаб этилади. Шунингдек, маданий алоқаларимизнинг мустаҳкамланишида Ўзбекистонда тожик киноси кунлари мунтазам равишда ўтказилиши тарафдоримиз. Жорий йилнинг май ойида Тожикистонга ижодий сафаримиз давомида “Тожикфильм” билан ҳамкорлик бўйича меморандум имзолаган эдик. Тожикистонлик киноижодкорлар билан ҳамкорликда ко-продукциялар ишлаб чиқаришни бошлаб юбордик. Бу борада бизга Ўзбекистон ва Тожикистон кинематографиясини ривожлантириш бўйича икки мамлакатнинг таниқли кино арбобларидан ташкил топган Идоралараро қўшма ҳамкорлик кенгаши катта ёрдам беради.
– “Тожикфильм” киностудияси ва Ўзбекистон Кинематография агентлиги ҳамкорликда фильмлар яратиши иккала давлат, икки халқ, томошабинлар ва киноижодкорлар учун ҳам фойдадир, – деди Абдужаббор Раҳмонзода. – Чунки биз илдизи бирлашиб кетган иккита халқмиз. Ушбу фильм ҳақида Концепция ишлаб чиқишга, уни амалда тадбиқ этишни кечиктирмаслик учун "Тожикфильм" ва Кинематография агентлиги ўртасида мустаҳкам кўприк бўлишга ва доимий ҳамкорликка тайёрмиз.
Учрашувда бу йирик кино-лойиҳадан ташқари, ўзбек ва тожик киноижодкорлари ҳамкорлигида суратга олиниши кутилаётган “Нотаниш юлдуз” ҳамда “Тошлар ва сув” картиналари, шунингдек жорий йилнинг июль ойи охирида Ўзбекистонда “Тожикистон киноси кунлари”ни ўтказиш бўйича ҳам суҳбатлашилди.
