O`zbekiston tashqi ishlar vazirining o`rinbosari G`ayrat Fozilov kecha EXHTning Evropada iqtisodiy hamkorlik bo`yicha Bonn konferensiyasining 30 yilligiga bag`ishlangan yuqori darajadagi onlayn-konferensiyasida ishtirok etdi, deb xabar bermoqda «Dunyo» AA muxbiri muxbiri.
Tadbirda EXHTga a`zo davlatlarning yuqori martabali vakillari, hamkorlar, qator xalqaro tashkilot va tuzilmalar ishtirok etdi.
Anjuman dasturidan ishtirokchi davlatlar o`rtasida iqtisodiy va ekologik hamkorlikni kuchaytirish, shuningdek, EXHT mintaqasida xavfsizlik va barqarorlikni ta`minlashning dolzarb masalalari o`rin oldi.
Mavzularga aloqador sessiyalarda raqamli o`zgarishlarning roli, COVID-19 inqirozining ijtimoiy-iqtisodiy oqibatlarini oldini olish uchun o`zaro yordam mexanizmlari, ayollarning iqtisodiy imkoniyatlarini kengaytirish, Evroosiyodagi aloqalar masalalari va iqlim o`zgarishining iqtisodiyot va xavfsizlikka ta`sirini yumshatish choralari muhokama etildi.
O`zbekiston tomoni mamlakatimiz Prezidentining Markaziy Osiyoni jahon iqtisodiyotiga integrasiyalashgan xavfsizlik, barqarorlik va barqaror taraqqiyot mintaqasiga aylantirishga qaratilgan mintaqaviy o`zaro bog`liqlikni mustahkamlash borasidagi tashabbuslari haqidagi batafsil ma`lumotlarni tadbir ishtirokchilarining e`tiboriga havola etdi.
Shu o`rinda O`zbekiston Prezidenti Shavkat Mirziyoev tashabbusi bilan 15-16 iyul kunlari Toshkent shahrida tashkil etilayotgan «Markaziy va Janubiy Osiyo: mintaqaviy o`zaro bog`liqlik. Tahdidlar va imkoniyatlar» xalqaro konferensiyasiga alohida e`tibor qaratildi.
Ushbu anjuman Markaziy va Janubiy Osiyoda o`zaro bog`liqlikni mustahkamlash bo`yicha strategik tasavvurni shakllantirish, ikki mintaqa davlatlarining transport va tranzit salohiyatini amalda joriy etish bo`yicha aniq takliflarni muhokama qilish, istiqbolli bozorlarga chiqish, eksportni kengaytirish, investisiya, innovasiya va texnologiyalarni jalb etish, gumanitar va sayyohlik birjalarini kengaytirishni ko`zda tutishi ta`kidlandi.
U «Markaziy Osiyo - Janubiy Osiyo» strategik bog`lanish modelining asosiy yo`nalishlari - transport va logistika, energetika, savdo, ishlab chiqarish, investisiya, texnologiya, madaniy-gumanitar sohalardagi ko`p tomonlama hamkorlikka doir masalalarni muhokama qilish uchun siyosiy va ekspert platformasi bo`lishiga mo`ljallangani qayd etildi.
Tadbir ishtirokchilari O`zbekistonning yirik transmintaqaviy aloqani o`rnatish borasidagi sa`y-harakatlarini mamnuniyat qayd etishar ekan, o`zaro bog`liqlik rejalarining amalda bajarilishi ikki mintaqada yangi iqtisodiy o`zgarishlarni yuzaga keltirishi hamda iqtisodiy hamkorlik va transport-kommunikasiyasi sohalarida ulkan EXHT makoniga yaxshi imkoniyatlar yaratishi mumkinligini ta`kidladilar.
