Ayni paytda o`z ishini boshlagan konferensiyada O`zbekiston rahbari mintaqalarning tarixiy aloqalari, mavjud tijoriy, madaniy, adabiy muloqotlari haqida eslatib o`tdi. Mintaqa xalqlarining tarxiy uyg`unligiga oid qiziq bir faktni yodga oldi: 1695 yilda hind hukmdori Avrangzeb rus savdogari Semyon Malenkiyga mamlakatda tijorat qilish huquqini beradi. Qizig`i, ushbu farmon eski o`zbek tilida yozilgan ekan.
Shavkat Mirzieyov bugun Afg`oniston o`zining yangi tarixida "tub burilish pallasi" o`tkazyapti deb ta`rif berdi va: "Ishonamizki, donishmand afg`on xalqi umummilliy maqsadlarga erishish uchun murosaga tayyor ekanini namoyon qiladi. Ishonchimiz komilki, bizning mintaqalararo hamkorligimiz, mamlakatda iqtisodiyotni tiklash, tinchlik va barqarorlikni o`rnatish uchun muhim omil bo`ladi", - deya qo`shimcha qildi.
Shuningdek, Prezident bir necha tashabbuslarni ham ilgari surdi:
- Savdo-iqtisodiy hamkorlik, kooperasiya va investisiyaviy aloqalarni kengaytirish uchun har yili mintaqalararo forum o`tkazish;
- Mozori Sharif – Kobul – Peshovar temir yo`lining qurilishini ishtirokchi davlatlar va xalqaro tashkilotlar tomonidan qo`llab-quvvatlanayotgani, mintaqalararo strategiyasining aloqalarni kuchaytirish uchun savdo, tranzit va bojxona jarayonlarini raqamlashtirish, qo`shma harakatlar strategiyasini qabul qilish;
- BMTning Oziq-ovqat va qishloq xo`jaligi tashkiloti shafeligida mintaqa mamlakatlari qishloq xo`jaligi vazirlarining uchrashuvini o`tkazib, qo`shma dastur ishlab chiqish;
- Markaziy va Janubiy Osiyoning turoperatorlarining yagona platformasini shakllantirish, Jahon sayyohlik tashkiloti ishtirokida mintaqada turizmni yanada rivojlantirish;
- YuNESKO shafeligida Termizda Markaziy va Janubiy Osiyoning tarixiy merosiga bag`ishlangan xalqaro forum o`tkazish;
- Qo`shma tadqiqot va tajriba almashish dasturlarini rag`batlantirish, olim va tadqiqotchilar uchun engillashtirilgan viza tartibini joriy qilish kabilar shular jumlasidandir.
Shavkat Mirziyoev nutqidan so`ng BMT bosh kotibi Antoniu Gutterish konferensiya ishtirokchilariga videomurojaat bilan chiqdi. Shundan so`ng, navbati bilan Pokiston bosh vaziri Imron xon va Afg`oniston prezidenti Ashraf G`ani nutq so`zladi.
