BMT qarorgohida Turkmanistonning BMTdagi missiyasi tomonidan «Tinchlik, xavfsizlik va taraqqiyot uchun do`stlar guruhi»ning uchrashuvi tashkil etildi, deb xabar bermoqda «Dunyo» AA muxbiri.
«Tinchlik va xavfsizlik yo`lida betaraf do`stlar guruhi» faoliyati guruhga a`zo davlatlar o`rtasidagi o`zaro manfaatli aloqalar, tinchlik va xavfsizlikni ta`minlash, barqaror rivojlanish maqsadlariga erishish masalalarida BMT doirasida faol ishtirok etish kabi do`stona munosabatlarni rivojlantirishga qaratilgan.
Guruhning asosiy maqsadi betaraflik siyosati tajribasidan kelib chiqqan holda mintaqaviy xavfsizlik va barqarorlik hamda ko`p tomonlama hamkorlikni rivojlantirish, shuningdek, tinchlikni ta`minlash bo`yicha betaraflik va preventiv diplomatiya tamoyillarini qo`llash hamda barqaror rivojlanishni ta`minlashdan iboratdir.
BMT Bosh kotibining Markaziy Osiyo bo`yicha maxsus vakili, Markaziy Osiyodagi mintaqaviy preventiv diplomatiya markazi rahbari, Jenevadagi xavfsizlik siyosati markazi direktori, EXHT sobiq bosh kotibi uchrashuv ishtirokchilariga murojaat yo`lladi.
Tadbirda O`zbekiston Prezidenti Shavkat Mirziyoevning, shuningdek, boshqa Markaziy Osiyo davlatlari rahbarlarining siyosiy irodasi tufayli 2017 yildan buyon mintaqada misli ko`rilmagan darajada ochiqlik siyosati kuzatilayotgani, bu ko`p jihatdan doimiy Maslahat uchrashuvlari o`tkazilishiga xizmat qilayotgani alohida ta`kidlandi. Ushbu formatdagi navbatdagi uchrashuv joriy yil 6 avgustda Turkmanistonda tashkil etiladi.
Shuningdek, mintaqadagi epidemiologiya vaziyati yomonlashganiga qaramasdan, Markaziy Osiyo davlatlari nafaqat koronavirus oqibatlarini sezilarli darajada yumshatish, balki gumanitar yordam almashish, vaqtincha bo`lib turgan fuqarolarga yordam ko`rsatish, tovarlar tranziti bo`yicha yaqin aloqalarni yo`lga qo`ygani ham qayd etildi.
Tadbirda O`zbekiston diplomatlari tomonidan zamonaviy dunyoda ko`ppartiyaviylik, profilaktika choralari, xalqlar o`rtasidagi tinchlik va ishonchni mustahkamlash borasidagi muhim ahamiyatga ega bo`lgan tashabbuslar to`la qo`llab-quvvatlanishi ta`kidlandi.
Shuningdek, uchrashuv ishtirokchilari 15-16 iyul kunlari Toshkentda o`tkazilgan yuqori darajadagi «Markaziy va Janubiy Osiyo: mintaqaviy o`zaro bog`liqlik. Tahdidlar va imkoniyatlar» xalqaro konferensiyaning asosiy natijalari bilan ham atroflicha tanishtirildi.
