IIVning "Postda" nashrining ma`lum qilishicha, O`zbekistondagi temir yo`llarda 2021 yilning yanvar—avgust oylarida 30 ta baxtsiz hodisa ro`y bergan.
Xususan, shunday holatlarning biri Angrenda yuz bergan. Ohangaronlik 34 yoshli fuqaro «Aqcha» va «Obliq» bekatlarining 91-kilometrida Toshkent—Angren yo`nalishi bo`yicha harakatlanib ketayotgan yo`lovchi poezdi urib ketishi oqibatida halok bo`lgan. Voqea kechki payt soat 19:15 larda yuz bergan.
Qashqadaryoning Qamashi tumanida 30 yoshli kishi ehtiyotsizlik oqibatida shunday baxtsiz hodisa qurboni bo`lgan. Uni «Nazarbek» va «Keles» bekatlari oralig`idagi 3359-kilometrida Andijon—Qo`qon—Toshkent yo`nalishida harakatlanib kelayotgan elektropoezd urib ketgan.
Shuningdek, ko`rilayotgan vaqt davomida vagonlar derazalari sindirilishi bo`yicha 11 ta holat, temir yo`lga yot jismni qo`yish bilan bog`liq 4 ta holat qayd etilgan.
