U san`atni va oilasini bir maromda olib borishga harakat qiladigan va buning uddasidan chiqayotgan mashhurlardan. O`zbekistonda xizmat ko`rsatgan artist Ziyoda bilan bugungi uchrashuvimizda uning oilasidagi an`analar, farzandi tarbiyasida qo`llaydigan usullari haqida so`z yuritamiz.
“To`rt oyligida gapirishni boshlagan”
O`g`limning tili to`rt oyligida chiqqan. “Oyi” deb tili chiqishini istagan bo`lsam ham kichkinagina bo`la turib “Dada” deganida shunday sevinganmanki asti qo`yaverasiz. O`g`lim bilan toza havoda sayrga chiqqanimizda u bilan xuddi katta odamdek gaplashib, gullar, osmon, umuman atrof-muhit bilan tanishtirardim. Go`dakligidan gullarni juda yaxshi ko`radi. Chiroyli, rang-barang gullarni ko`rsa ko`zlari katta-katta bo`lib sevinib, “gul, gul” deb pitirlashni boshlaydi.
“Dadamga mexribon bo`ling...”
O`g`limning menga aytgan har bir gapiga e`tiborli bo`lishga harakat qilaman. Chunki u juda aqlli, xuddi kattalardek fikrlaydi. Ayniqsa, kuni kecha menga aytgan gapi bir umr yodimda qolsa kerak. O`z-o`zidan “Oyijon, siz juda ham mehribonsiz” dedi. Ko`nglim to`lib, xursand bo`ldim. “Rahmat bolam. Senga mehribon bo`lmay, yana kimga mehrimni berardim” desam, “Dadamga mehribon bo`ling” deydi. To`g`risi, 3 yashar bolam menga bunday gapni aytishini kutmagandim, dovdirab qolganimdan “xo`p xo`p” deya oldim xolos.
“Shirinlik mumkin emas”
Bola o`zi istagan narsani qilavermasligi kerak deb hisoblayman. O`g`lim Komronga ko`p narsalarni taqiqlayman. Ulardan birinchisi bu — shirinliklar. Umuman olganda bolaga 4 yoshgacha shirinlik bermaslik kerak. Chunki, shirinlikka o`rgangan bolani keyin bundan qaytarish qiyin. Haddan tashqari ko`p shirinlik eyish esa bolaning sog`lig`i uchun zarar. O`g`lim ko`proq konfet, shokolad eb qo`ysa isitmasi chiqadi yoki allergiyasi qo`ziydi. Iloji boricha kamroq shirinlik berishga harakat qilaman-u, ammo erkalab so`raganda o`zimni tutolmay, ko`nglim bo`shab ketadi. Bundan tashqari o`g`lim so`nggi paytlarda telefon o`yinlariga bog`lanib qolyapti. Qo`limda telefon ko`rib qolsa o`yin qo`yib ber deb xarxasha qiladi. Texnika uning uchun zarar ekanini bilganim uchun ham iloji boricha cheklashga harakat qilaman.
“Injiqlik qilsa, men ham injiqlanaman”
Kichkintoyim ba`zida o`zini aytganini qildirish uchun haddan tashqari injiq bo`lib qoladi. Ko`ngliga qaraganim sari erkalanaveradi. Shuning uchun ba`zida urushib ham qo`yaman. Uning injiqliklariga men ham o`ziday javob qaytaraman. Misol uchun yig`lasa, xuddi o`ziday yig`layman. Erga yotib olsa, men ham yotib yig`layveraman. Xullas, nima qilsa, qaytarayotganimni ko`rib, kulib yuboradi. Keyin nima uchun yig`layotgani ham esidan chiqib qoladi. Komronning xarxashasini o`zim o`ylab topgan shu usul bilan to`xtatadigan bo`lganman (kuladi).
“Va`damni bajara olmayapman”
Faoliyatim sabab o`g`lim oldida ko`pincha xijolat bo`lib qolaman. Ya`ni to`y-hashamga ketish paytimizni yaxshi bilib olgan. “Oyijon, meni tashlab ketib qolmang! Birga o`ynaymiz” deganida “Xo`p-xo`p” deb chalg`itib, bilintirmay uydan chiqib ketamiz. Ana shunday holda uni aldaganimdan, ketmayman, deb va`da berib bajarmaganimdan xafa bo`laman...
“Mening bolam boshqacha”
Har bir bolaning harakatlarida o`ziga xos noodatiy jihatlarini kuzatish mumkin. Nokamtarlikka yo`ymang-u, biroq Komronim boshqalarning bolasidan biroz boshqacha-da. Mahalladagi bolalar bilan, uyga kelgan mehmon bolalar bilan o`ynaganda ham uni kuzatib turaman, yoshiga nisbatan aqlli gaplarni aytadi. Dunyoqarashi boshqacha. Agar kimdir unga yoqmaydigan ish qilsa, xuddi katta odamdek noto`g`ri ish qilganini tushuntirib, unday qilmaslik kerakligiga o`rgatib o`tiradi. Ba`zida, nahotki shu meni bolam deb o`ylanib qolaman.
“Birinchi o`rinda - odob”
Nazarimda bola tarbiyasida birinchi o`rinda odob turadi. Men ham o`g`lim gapga tushuna boshlagandan unga odobli bo`lishni o`rgatganman. Kattalarni ko`rganda salom berish, dasturxonga o`tirganda aytiladigan so`zlar, ovqat eb bo`lib fotiha qilish kabilardan boshlangan tarbiya kelajagiga katta ta`sir ko`rsatadi deb hisoblayman. Bundan tashqari ko`zlagan maqsadiga erishish uchun oson yo`lni ko`zlamaslik kerak deb o`ylayman. Masalan, ota-onam menga ham hamma narsani istaganimda muhayyo qilishmagan. Avval ular aytgan ishni qilib, yaxshi o`qishga, aytilgan vazifalarni vaqtida bajarishga harakat qilardim. Keyin meni aytganim bo`lardi. Men ham xuddi shunday tarbiya usulida o`g`limga tarbiya beryapman.
“Bo`-bo`”dan qo`rqmaydigan bo`lgan”
Menimcha har bir onada bolani “qo`rqitish” yo`llari bor. Men ham Komronga “ana devorni orqasida “bo`bo`” turibti, hozir kelib qoladi” derdim. Ammo bu usul eskirganga o`xshaydi. Yaqinda “Komron to`polon qilma, ho-o-ozir “bo`bo`” keladi” desam, Jim turdi-da, “Oyi ko`zingizni yuming shkafni ichida “bo`bo`” bor deydi. Bolam endi meni “qo`rqityapti”.
“Javobi yo`q, savol bor...”
Mashhur hamkasblarimdan birining intervyusini o`qiganimda uning “Farzandimni bolaligini ko`rolmaganimdan dilim og`riydi, shundan qattiq siqilaman” degan gapi e`tiborimni tortdi. Nazarimda, bu har bir san`atkor ota-onani qiynaydigan masala bo`lsa kerak. Vaqti kelib, o`g`lim “Oyi, nega men bilan kam vaqt o`tkazgansiz?” desa nima deb javob berishni bilmayman. Biz ota-onalar, oilam, bolalarimni kelajagi, ishimiz deb yugurib yurib ba`zida farzandlar bilan o`yin o`ynashga ham vaqt topolmay qolamiz. Bu bizning og`riqli nuqtamiz. O`ylaymanki, o`g`lim katta bo`lganda dadasi va meni tushunadi. Yuqoridagi o`kinch, afsus bizda ham bo`lmasligi uchun bugun iloji boricha o`g`limiz bilan ko`proq vaqt birga o`tkazib, hatto ba`zida o`zimiz bilan olib yurishga ham harakat qilamiz.
Aliya SULAYMANOVA tayyorladi
10.12.2019, 20:06
Taniqli shved guruhi — «Roxette» solisti Mari Fredriksson 61 yoshida vafot etdi. Bu haqda Shvesiya OAVlariga asoslanib xabar berildi.Dagens Nyheter nashrining yozishicha, xonanda uzoq yillar davomida saraton xastaligiga...11.08.2017, 16:04
"Darakchi" gazetasidagi "10 qaltis savol" loyihasining galdagi mehmoni professionalmusiqiy bilimga ega xonanda UMIDAXON... 1 — “Umr o`tar”, “Yulduzimsan”, “Sendadur ko`nglim” va “Yo`limdan qoch”, “Serial”, “Safsata”...11.08.2017, 13:51
O`zbekiston va Qoraqalpog`iston xalq artisti Ozodbek Nazarbekov jurnalist Jasur Hamroev bilan suhbatda madaniyat vaziriningbirinchi o`rinbosari sifatidagibirinchi ish kuni qanday o`tgani hamda endilikda ijodini davom ettirishi...08.08.2017, 10:55
7 avgust kuni o`zbek shou-biznesining ikki vakili oila qurdi. Poytaxtdagi "Osiyo grand" restoranida Shohruhxonning ukasi, aktyor Muhammadali va Irodaxonning visol oqshomi bo`lib o`tdi. Shu kuni...