"Darakchi" tahririyatiga Qashqadaryo viloyati Muborak tumani “Qarliq” MFYda yashovchi fuqarolar tomonidan mahalladagi “Bodomzor” va “Buyuk ipak yo`li” ko`chalarining nosozligi, boshqa ko`chalarda amalga oshirilgan ta`mirlash ishlarining shu ko`chaga kelganda to`xtab qolgani yuzasidan murojaat kelib tushgach, masalaga oydinlik kiritish maqsadida aynan shu hududda bo`ldik.
— 25 yildan buyon shu mahallada yashayman, - deydi mahalla fuqarosi Jumagul Elmurodova. – Shuncha paytdan buyon ko`chalarimizda deyarli bir ish qilinmadi. Odamlar hashar yo`li bilan qum-shag`al to`kishardi. Ammo yog`inli kunlar ortidan yana eski holiga qaytardi. Yanayam o`tgan yillarda ko`chalarga e`tibor berildi. Ammo bolalarimiz maktabga, bog`chaga, aholi esa bozor-o`char, shifoxonaga borishda foydalanib kelayotgan asosiy “Bodomzor” ko`chasidagi ishlar bir boshlanib, oxiriga etmay to`xtab qoldi. Odamlar o`zi bilganicha ko`chani to`sib qo`ygan, yozda chang-to`zon, qishda loy. O`quvchilarni ota-onalar ko`tarib maktab bog`chaga olib borib qo`ymasa, yarim yo`ldan loyga belanib qaytib keladi. Bizni ham tekis va asfalt yo`llarda yurgimiz keladi.
Fuqaro bilan suhbatlashib yo`limizda davom etdik. Ta`kidlash kerakki, mahalladagi aksariyat ko`chalar qum-shag`al, asfalt bilan qoplangan. Kichik ko`chalarni aytmaganda, texnika harakatlanishi uchun ko`zga tashlanadigan muammo yo`q. Murojaatda ta`kidlangan “Bodomzor” ko`chasi esa chindan ham ta`mirga muhtoj ekan. Qolaversa, ko`cha bo`ylab, odamlarning turli ko`rinishdagi imoratlari ko`chani tartibga keltirishga to`sqinlik qilib turganini ko`rish mumkin.
“Bodomzor” ko`chasidan o`tib, “Buyuk ipak yo`li” ko`chasi tomon harakatlandik. Uzunligi qariyb 700 metrni tashkil etadigan ko`chada biror marta ta`mirlash ishlari olib borilmaganini holatning o`zi ko`rsatib turibdi.
— Bu ko`cha avval juda tor va notekis edi, - deydi shu ko`chada yashovchi Jamshid Abdivoitov. - aholi pul yig`ib, qum to`kib ko`chani biroz ko`tardik. Lekin qishgi yog`ingarchiliklardan so`ng yana loy bo`lib qoladi. Buni bitta yo`li ko`chani tekislab asfaltlash kerak. Mahalla mutasaddilari ko`chani dasturga tushgani, asfalt qilinishi haqida aytishgandi. Negadir hech bir amaliy harakat qilinmadi.
Ko`chalarni aylanib mahalla idorasiga o`tdik. “Qarliq” MFY raisi Rahmiddin Muhammadov. muammoga izoh berarkan, aynan shu ko`chalarni 2022 yilgi dasturga kiritish to`g`risida tuman hokimligiga murojaat qilinganini ma`lum qildi.
— Haqiqatdan ham yuqoridagi ikkita ko`cha ta`mirga muhtoj, -deydi Rahmiddin Muhammadov. Joriy yilda bir qismiga tosh-shag`al yotqizish ishlari boshlangan edi. Ammo mablag` masalasi tufayli ish yakuniga etmay qoldi. Ayni paytda tuman hokimligiga mahallada 5,5 kilometr yo`lga tosh-shag`al, 5 kilometr yo`lga asfalt yotqizish ishlarini 2022 yilgi davlat dasturiga kiritish to`g`risida xat berganmiz. Nasib bo`lsa, 2022 yilda “Bodomzor” hamda “Buyuk ipak yo`li” ko`chalari to`liq asfaltlanadi.
Shavkat AMINOV
