Gazli O`zbekistonning eng yirik gaz konlaridan biri sanaladi. U 65 yillik tarixi davomida ko`tarinki davrlarni ham, tahlikali kunlarni ham boshdan kechirgan. 1976 yilda qator zilzilalardan so`ng butunlay yakson bo`lib, Qaqnus qushidek kuldan qayta tiklangan Gazlining bugun 65 yillik yubileyi nishonlandi.
1956 yil asos solingan «Gazli» o`sha paytda SSSRdagi eng yirik gaz koniga aylangan. Zahirasi bo`yicha u dunyo bo`yicha birinchi o`rinda turgan. «Gazli» konining ochilishi yangi gaz va neft qazib chiqarish bazasini yaratish va mamlakatning yoqilg`i-energetika muvozanati tuzilmasini yaxshilash imkonini bergan.
«Gazli» koni yubileyi munosabati bilan tashkil etilgan tadbirda «Gazli Gas Storage» kompaniyasi xodimlari, konning faxriy xodimlari, shuningdek O`zbekiston Respublikasi Energetika vazirligi, «O`zlitineftegaz» AJ hamda boshqa idora va tashkilotlar vakillari ishtirok etdi. «Gazli Gas Storage» vakillari uzoq yillar «Gazli» konida mehnat qilgan faxriylarni qutlab, ularga esdalik sovg`alarini topshirdi. Tantanali tadbir ochilishida «O`zlitineftegaz» AJ raisi Ulug`bek Nazarov so`zga chiqdi. U yig`ilganlarga konning 1956 yilda boshlangan boy tarixi haqida eslatib o`tdi. Tadbir davomida Buxoro viloyati Romitan tumani hokimi Xurshid Toxirov ham so`zga chiqib, tashkilot xodimlarini bayram bilan tabrikladi.
Tadbir davomida konning faxriy xodimlari Olimjon Zakirov, G`ani Ikramov, Ne`matjon Obidov, Kenjibay Erdashev va boshqalar ham o`z fikrlarini bildirishdi. Ular shuningdek, mehnat yillaridagi xotiralari bilan o`rtoqlashishdi, Tadbir so`ngida mehmonlar bayramona kayfiyat uchun «Gazli Gas Storage» rahbariyatiga minnatdorlik izhor etdi.
