Hozirda texnologiyalar shunchalik tez o`zgaryaptiki, 2030 yilga borib dunyo butkul o`zgarib ketishi mumkin degan taxminlar qilinmoqda. Aynan shuning uchun ham dunyodagi barcha rivojlangan va rivojlanayotgan mamlakatlar axborot texnologiyalari sohasiga katta e`tibor qaratmoqda. O`zbekiston ham bundan istisno emas, yosh startap loyihalarni qo`llab-quvvatlanmoqda, axborot texnologiyalari sohasida faoliyat yuritayotgan kompaniyalarga katta imtiyozlar berilmoqda.
Jumladan, Innovasion rivojlanish vazirligi tomonidan qo`llab-quvvatlab kelinayotgan startap loyihalaridan biri – to`ldirilgan reallikka asoslangan NazzAR mobil ilovasini yaratgan SmartChain IT kompaniyasidir.
Vazirlik matbuot xizmatining ma`lum qilishicha, SmartChain 2018 yildan beri innovasion texnologiyalar bilan shug`ullanib kelmoqda – to`ldirilgan reallik yo`nalishida qator ishlarni amalga oshirmoqda. Smartfon orqali NazzAR belgisiga yo`naltirilganda mobil qurilma ekranida real ob`ektlarning 3D shakllari, video roliklari, foto suratlar jonlanadi. Yurtimizda bugungi kunda NazzAR mobil ilovasining imkoniyatlari turizm sohasida, ayniqsa muzeylarda keng qo`llanilmoqda. Samarqand shahridagi «Go`ri Amir», «Bibixonim» maqbaralari, Ulug`bek rasadxonasi, «Afrosiyob» muzeyi, «Elmerosi» ilmiy kiyimlar teatri, O`lkashunoslik muzeyi, Axrorxo`ja ansambli, Xiva shahridagi «Ichan qal`a», Samarqand shahridagi Registon maydoni, Buxoro shahrida «Ark» va «Mohi xossa» tarixiy madaniy meros ob`ektlari, Toshkent shahridagi Temuriylar tarixi Davlat muzeyi, O`zbekiston tarixi davlat muzeyi, Abdulla Qahhor, Sergey Borodin, Muxtor Ashrafiy uy-muzeylari va boshqa tarixiy maskanlarda mazkur mobil ilova orqali eksponatlar haqidagi ma`lumotlarni yanada qiziqarli shaklda sayyohlarga etkazish imkoniyati yaratilgan.
Innovasion rivojlanish vazirligi veb-sayti orqali vazirlik binosiga virtual sayohat, "InnoWeek-2021" Xalqaro innovasion g`oyalar haftaligi doirasidagi ko`rgazmaning virtual talqini ham aynan mazkur startap kompaniyasi faoliyati samarasidir. Bundan tashqari, Innovasion rivojlanish vazirligi binosida ham ko`plab to`ldirilgan reallik elementlari qo`llanilgan. Vazirlik binosiga kiraverishda mehmonlarni virtual gidning kutib olishi, vazirlik binosidagi xonalar, laboratoriyalar haqida NazzAR mobil ilovasi orqali ma`lumotlarga ega bo`lish va hokazolar.
SmartChain kompaniyasi o`z mahsuloti bilan bozorga kirib kelarkan, kompaniyaning yosh, iste`dodli mutaxassislari NazzAR platformasini yaratish va rivojlantirish bilan bir qatorda iste`molchilarga uning imkoniyatlarini tushuntirish, targ`ib qilish bilan shug`ullanishiga to`g`ri keldi.har bir yangi loyiha amalga oshirilarkan, iste`molchilarning NazzAR brendiga qiziqishi tobora oshib borar, unga talab kuchayardi.
Xalqaro ko`rgazmalarda ishtirok etish, yirik davlat idoralari bilan o`zaro hamkorlik va IT-platformani rivojlantirish bo`yicha doimiy ishlar o`z samarasini berdi – joriy 2021 yilda Islandiya kompaniyasi bilan hamkorlik yo`lga qo`yildi.
«Jamoamiz tomonidan xorijlik hamkorimiz uchun yangi, noyob mahsulot yaratildi va u UnoAR deb nomlandi. Mazkur to`ldiriligan reallik asosida ishlaydigan texnologiya SmartChainning eng yaxshi texnologik echimlari va ishlanmalarini o`zida mujassam etgan. Birinchi xorijiy mijozimiz elektronika sohasidagi yirik chakana sotuvchilardan biridir», – deydi SmartChain IT kompaniyasi direktori Bobur Rahimov.
O`zbekistonda yaratilgan texnologiyaning xorijda tatbiq etilganiga bir necha oygina bo`ldi, va yurtimiz startap kompaniyasi tomonidan yaratilgan mahsulot tobora ommalashmoqda. 2021 yilning 6 dekabr holatiga ko`ra NazzAR platformasida qurilgan echim Islandiyada yuklab olingan o`z toifasidagi AppStore ilovalarining eng mashhur 10 taligi ichida 2-o`rinni egalladi.
«Bu boshlanishi. Biz xalqaro maydonga endi qadam qo`ydik va yangi hamkorliklarga tayyormiz, – deydi SmartChain kompaniyasi rahbari.
