Homilador ayollar o`rtasida koronavirus xastaligiga chalinish holatlari ko`p kuzatilyapti. Xo`sh, ular bu vaziyatda qanday yo`l tutishlari lozim? COVID-19dan uy sharoitida xalos bo`lish mumkinmi?
Respublika perinatal markazi direktori, tibbiyot fanlari doktori Nilufar O`rinbaeva shu haqdagi tavsiyalari bilan o`rtoqlashdi.
Hozirgi kunda kasallikning yangi shtammi engil kechayotgani sababli unga chalingan homilador ayollar aksariyat hollarda uy sharoitida davolansa bo`ladi. Bu vaziyatda xastalik ham ona, ham tug`ilajak bola salomatligiga xavf tug`dirmaydi.
Ularda yangi shtamm asosan simptomsiz va engil shaklda kechmoqda. Bu holatda tana harorati 38,5 °S darajadan past, nafas etishmovchiligi yo`q, saturasiya 94 foizdan yuqori bo`lishi kuzatilyapti.
Ushbu vaziyatda oilaviy shifokor tomonidan bemorga uy sharoitida ambulator davo muolajalari tayinlanadi. Agar homiladorning tana harorati ko`tarilsa, 3 kun davomida kuniga 4 marta parasetamol tabletkasi berish mumkin.
Shuningdek:
✅ 10 kun davomida sutkasiga 1 marta vitamin D - 5000ME;
✅ 10 kun davomida sutkasiga 1 marta 100 mgdan sink (rux) preparati;
✅ 15 kun davomida sutkasiga 2 marta 2 500dan vitamin S qabul qilinadi, xolos.
Davolanish paytida ko`proq suyuqlik ichish, qo`llarni tez-tez sovunli suv bilan yuvish hamda burun va tomoqni chayish, xonalarni shamollatib turish tavsiya etiladi. Uy sharoitida o`zboshimchalik bilan antibiotik va gormonlarni qabul qilish mutlaqo mumkin emas.
Agar koronavirusga chalingan homilador ayolning tana harorati kasallik davrida 38,5 °S darajadan tushmasa, nafas olishi tinch holatda ham tezlashsa va saturasiya 93 foizdan past bo`lsa, darhol shifokorga murojaat qilinadi va bemor stasionar davolashga yo`naltiriladi.