Saudiya Arabistonida gandbol bo`yicha erkaklar o`rtasida Osiyo chempionati bo`lib o`tmoqda. Unda ishtirok etayotgan terma jamoamiz dastlabki saralash bosqichini muvaffaqiyatli yakunladi. Bu haqda Olimpiya qo`mitasi matbuot xizmati xabar bermoqda.
Birinchi turda Gonkongni 28:24 hisobida mag`lub etishni uddaladilar, biroq ikkinchi turda bahraynlik raqiblariga 19:35 hisobida imkoniyatni boy berishdi. Hal qiluvchi uchinchi turda esa Vetnam jamoasi 30:23 hisobida taslim etildi.
Shu tariqa jamoamiz kuchli sakkizlikka kirib, navbatdagi bosqichda o`z ishtirokini davom ettiradi. Unda yana 2 kvartet shakllanadi. O`z guruhlarida birinchi va ikkinchi o`rinni qo`lga kiritganlar yarim final bosqichiga yo`l oladi. Qayd etish joiz, uchinchi o`rin egalari o`rtasidagi bahs ham katta ahamiyatga ega. Unda g`alaba qozongan jamoa qit`amizning beshinchi termasi sifatida kelasi yil bo`lib o`tadigan jahon chempionati yo`llanmasiga ega bo`ladi.
