Avval xabar qilganimizdek, 11 fevral kuni Andijon viloyati Shahrixon tumanidagi kasalxonada portlash sodir bo`ldi.
Qirg`izistonning O`zbekistondagi elchixonasi Andijon viloyati Shahrixon tumanida “Ziteriya” xususiy davolash-diagnostika markazida gaz-havo aralashmasining portlashi oqibatida Qirg`iziston Respublikasi fuqarosi 1966 yilda tug`ilgan R.N. vafot etgani haqida ma`lum qilgan.
Ma`lum qilinishicha, Qirg`iziston Respublikasi fuqarosining jasadi yaqin qarindoshlari tomonidan Qirg`izistonga etkazildi. Bu masala Qirg`izistonning O`zbekistondagi elchixonasi nazoratida, deyiladi xabarda.
Mazkur holat yuzasidan O`zbekiston Respublikasi Jinoyat kodeksining 257-moddasi (mehnatni muhofaza qilish qoidalarini buzish) bilan jinoyat ishi qo`zg`atilgan. Hozirda mazkur holat yuzasidan dastlabki tergov harakatlari olib borilmoqda.
