Tadbirkorlik faoliyatini endigina boshlayotgan yurtdoshlarimiz bankdan imtiyozli kreditlar olib, o`z ish faoliyatini boshlashga harakat qiladi. Qo`lida mablag`i yo`q inson uchun kredit bir imkoniyatdir. Bugun banklar tomonidan yakka tartibdagi tadbirkorlarga ajratilayotgan imtiyozli kreditlar berilishida bank, tadbirkor va ta`minotchi o`rtasida tuzilayotgan shartnomalar mavjud. Uch tomonlama tuzilgan shartnomalar sharti ko`p hollarda ta`minotchilar tomonidan buzilayotganini guvohi bo`lmoqdamiz.
Samarqand viloyati Ishtixon tumani “Kattaqangli” MFY 37-uyda yashovchi fuqaro Gulhayo Saydullaeva 2022 yil 12 yanvar kuni Iste`molchilar huquqlarini himoya qilish federasiyasi “ ishonch telefoni”ga murojaat qilgan. U o`z murojaatida Agrobankdan tikuvchilik faoliyatini boshlash uchun 27 million 300 ming so`m imtiyozli kredit olganini ma`lum qilgan. Yuqorida keltirganimiz uch tomonlama shartnomaga muvofiq tadbirkor Gulhayo Saydullaevaga ta`minotchi Komil Tuyg`unov tomonidan 27 300 000 so`m evaziga tikuv mashinasi va xom ashyo etkazib berilishi kerak bo`lgan. Mablag` bank tomonidan ta`minotchiga o`z vaqtida o`tkazilgan bo`lsa ham, kelishuvga binoan Komil Tuyg`unov tadbirkorga vaqtida tikuv mashinasi va xom ashyolarni etkazib bermaganidan G. Saydullaeva norozilik bildirgan.
Bu kabi vaziyatda va`da berib, vaqtida bajarmaslik insoniylik prinsiplariga ham qonuniylik tamoyillariga ham to`g`ri kelmaydi. Samarqand viloyati Iste`molchilar huquqlarini himoya qilish jamiyati xodimlari tomonidan ushbu murojaat o`rganildi. Ta`minotchi Komil Tuyg`unovga shartnomani bajarish tamoyillari tushuntirildi. Iste`molchining huquqlari qonuniy jihatdan himoyalanib, murojaati ijobiy hal etildi. G.Saydullaevaga 27 300 000 so`mga tikuv mashinasi va xom ashyolar etkazib berildi. Hal etilgan bu murojaatning tag zamirida bir ayol taqdiri, orzu-maqsadlari turibdi. Bugun shartnoma shartini bajarmayotgan, va`da berib cho`zib yurgan ta`minotchilar bir o`ylab ko`rishsin, ularning bunday o`yinlari natijasida kimningdir oilasi, yosh go`daklari jabr chekishi, endigina tadbirkorlikka qadam qo`yayotgan bir insonning qaddi bukilishi mumkin. Insonlar taqdirini esa uyin qilib bo`lmaydi!
Gulnoza Sharafova, jurnalist
