Qozog`istonda ta`lim olayotgan O`zbekiston fuqarolari o`rtasida «Zakovat» intellektual o`yini doirasida «O`zbekiston Respublikasining Qozog`iston Respublikasidagi elchisi kubogi-2022» tanlovi o`tkazildi.
Tanlovning birinchi tur o`yini kecha, 20 fevral kuni O`zbekiston elchixonasi binosida o`tkazildi. Unda Ostona tibbiyot universiteti, L.M.Gumilyov nomidagi Evrosiyo milliy universiteti, M.S.Narikbaev nomidagi Qozog`iston ijtimoiy-yuridik universiteti va Qarag`anda viloyatidagi «Bolashaq» akademiyasida tahsil olayotgan yosh vatandoshlarimiz ishtirok etdi.
Birinchi tur natijalariga ko`ra, M.S.Narikbaev nomidagi Qozog`iston ijtimoiy-yuridik universiteti jamoasi birinchi o`rinni egalladi. Ikkinchi o`rin «Bolashaq» akademiyasi va uchinchi o`rin L.M.Gumilev nomidagi Evrosiyo milliy universiteti jamoalariga nasib etdi.
G`olib jamoalarga elchixona nomidan diplom va qimmatbaho sovg`alar topshirildi.
«Bolashaq» akademiyasining Talabalarga xizmat ko`rsatish markazi rahbari Aydana Apeeva «Zakovat» intellektual o`yinlari bundan oldin Akademiyada o`tkazilganini yodga oldi.
«O`zbekiston elchixonasi tomonidan tashkil etilgan ushbu bilimlar musobaqasi juda yuqori saviyada tashkil etildi, - dedi u. - O`yinlar juda qiziqarli ruhda o`tdi. Talabalar shu tariqa o`z bilimlarini sinovdan o`tkazishdi.
«Zakovat» bilim olishga va kitob o`qishga intilayotgan yoshlarning yangi qirralarini kashf etishga xizmat qiladi. Shu bois o`zbekistonlik talabalarning har yili bunday tadbirlarda ishtirokini ta`minlashga yaqindan ko`mak berishga tayyor ekanligimni bildirishni istar edim».
«O`zbekiston Respublikasining Qozog`iston Respublikasidagi elchisi kubogi-2022» turnirining navbatdagi bosqichi bellashuvlari shu yil mart oyida Olmaota shahri va Olmaota viloyati oliy ta`lim muassasalarida tahsil olayotgan O`zbekiston fuqarolari o`rtasida o`tkaziladi.
