Hozirda aholining kamida 2-3 milliard kilovatt soat elektr energiyasiga qo`shimcha talabi mavjud. Bu haqda Prezident raisligida qayta tiklanuvchi energiyadan foydalanishni kengaytirish bo`yicha ustuvor vazifalarga bag`ishlangan yig`ilishda ma`lum qilindi.
Ma`lum qilinishicha, kelgusi besh yilda esa bu ehtiyoj yana 10 milliard kilovatt soatga oshadi. Bunday vaziyatda eng samarali yo`l — muqobil energiyadan foydalanishni ko`paytirish. Bu borada 2019 yilda alohida jamg`arma tashkil qilinib, aholiga byudjetdan subsidiya berish tizimi joriy etildi.
Lekin birorta viloyat, tuman va shahar hokimida yoki vazirda o`z tizimidagi tashkilotlarda energiya iste`moli, uni tejash, muqobil energiya uskunalarini o`rnatish bo`yicha hisob-kitob yo`qligi, ular joriy qilingan subsidiya va kompensasiyadan o`z tarmog`i yoki hududida foydalanish bo`yicha jon kuydirmagani tanqid qilindi.
Muqobil energiya uskunasini o`rnatgan aholi va tadbirkorlarni qo`llab-quvvatlash bo`yicha mutlaqo yangi tizim joriy etiladi
Bunda, aholi va tadbirkorlarga:
- o`rnatilgan quyosh va shamol elektr uskunalari uchun quvvatiga qarab 15 million so`mgacha, suv isitish qurilmasi uchun esa 2 million so`mgacha kompensasiya to`lanadi;
- yoki uskuna qiymatini 3 yil ichida foizsiz bo`lib-bo`lib to`lash imkoniyati yaratiladi.
Ushbu tizim Energetika vazirligining maxsus jamg`armasi orqali joriy etilishi belgilandi.
