Bosh prokuratura huzuridagi Departamentning Beruniy tuman bo`limi tomonidan olingan tezkor ma`lumotlarga asosan IIB xodimlari bilan hamkorlikda tezkor tadbir o`tkazildi.
Unda, fuqaro U.G. o`z uyida yashirin sex tashkil qilib, qalbaki aksiz markali alkogol mahsulotlarini ishlab chiqarayotganligi aniqlanib, tadbir davomida ushbu xonadondan 4 861 dona qalbaki aksiz markalar, 403 dona “Qaratau” nomli qo`lbola usulda tayyorlangan alkogol mahsulotlari, hajmi 1 litr idishdagi 191 dona spirt, shtrix kodli yorliqlar va ishlab chiqarishda foydalanilgan boshqa tovar moddiy boyliklar ashyoviy dalil sifatida olingan.
Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog`ozlar yasash, ularni o`tkazish) bilan jinoyat ish qo`zg`atilib, tergov harakatlari o`tkazilmoqda.
