Surxondaryo viloyati Sariosiyo tumanida yashovchi 66 yoshli M.A. o`z qarindoshini gumdon qilish uchun termizlik A.B.ga murojaat qildi va o`zining tengdoshi bo`lgan qarindoshini o`ldirib berish evaziga unga 50 million so`m va`da qilgan. Bu haqda UzA yozmoqda.
Ma`lum qilinishicha, o`zganing qo`li bilan amalga oshirilishi kerak bo`lgan jinoyat rejasining “umri” uzoqqa cho`zilmadi.
Joriy yilning 24 iyul kuni DXX Surxondaryo viloyati bo`yicha boshqarmasi, viloyat IIB hamda viloyat prokuratura tezkor xodimlari hamkorligida Denov tumanida o`tkazilgan tezkor tadbirda M.A. oldindan kelishilgan puldan 1,8 million so`mni “killerga” berayotgan vaqtda jinoyat ustida qo`lga olinadi.
Hozirgi vaqtda o`z hayotini detektiv kinolarga aylantirmoqchi bo`lgan M.A.ga nisbatan jinoyat kodeksining 97-moddasi 1-qismi bilan jinoiy ish qo`zg`atilib, qamoqqa olish tarzidagi ehtiyot chorasi qo`llanildi.
Holat bo`yicha tergov harakatlari olib borilmoqda.
