Сурхондарё вилояти Сариосиё туманида яшовчи 66 ёшли М.А. ўз қариндошини гумдон қилиш учун термизлик А.Б.га мурожаат қилди ва ўзининг тенгдоши бўлган қариндошини ўлдириб бериш эвазига унга 50 миллион сўм ваъда қилган. Бу ҳақда УзА ёзмоқда.
Маълум қилинишича, ўзганинг қўли билан амалга оширилиши керак бўлган жиноят режасининг “умри” узоққа чўзилмади.
Жорий йилнинг 24 июль куни ДХХ Сурхондарё вилояти бўйича бошқармаси, вилоят ИИБ ҳамда вилоят прокуратура тезкор ходимлари ҳамкорлигида Денов туманида ўтказилган тезкор тадбирда М.А. олдиндан келишилган пулдан 1,8 миллион сўмни “киллерга” бераётган вақтда жиноят устида қўлга олинади.
Ҳозирги вақтда ўз ҳаётини детектив киноларга айлантирмоқчи бўлган М.А.га нисбатан жиноят кодексининг 97-моддаси 1-қисми билан жиноий иш қўзғатилиб, қамоққа олиш тарзидаги эҳтиёт чораси қўлланилди.
Ҳолат бўйича тергов ҳаракатлари олиб борилмоқда.
