Qashqadaryoda yigitlar o`rtasidagi janjal o`lim bilan yakunlangani haqida xabar bergan edik.
Jurnalistik surishtiruvga ko`ra, ushbu janjalda 22 yoshli yigit unashtirilgan qizi bilan uchrashuvga chiqqanida, qizning sinfdoshlari tomonidan vahshiylarcha kaltaklab, o`ldirilgani ma`lum bo`ldi.
Ma`lum qilinishicha, vahshiy qotillik joriy yilning 12 avgust kuni taxminan soat 1:30 lar atrofida Chiroqchi tumanida sodir bo`lgan.
“Galabek” MFYda yashovchi H.O. ismli yigit qo`shni qishloqqa unashtirilgan qizi bilash uchrashishga borgan. Uchrashuvdan qaytayotganda shu qishloqlik yigitlar uni urib, jiddiy jarohat etkazishadi. Natijada jabrlanuvchi H.O. Chiroqchi tumani tibbiyot birlashmasi shifoxonasiga yotqizilgan. Shifokorlar tomonidan ko`rsatilgan tibbiy muolajalarga qaramay olgan tan jarohatlari sababli H.O. vafot etgan.
Viloyati IIB matbuot xizmati holat yuzasidan 2022 yil 12 avgust kuni Chiroqchi tuman IIB huzuridagi Tergov bo`limi tomonidan jinoyat ishi qo`zg`atilib, fuqarolar A.M. va Q.M.larga O`zbekiston Respublikasi JKning 104-moddasi 3-qismi “d” bandi bilan ayblov e`lon qilinib, O`zbekiston Respublikasi Jinoyat prosesual kodeksining 221-moddasi tartibida ushlanganligini ma`lum qilgan.
Ammo guvohlar janjalda ikki kishi emas, 20 ga yaqin yigitlar ishtirok etganligiga qaramay jazodan chetda qolayotganligini ta`kidlashmoqda.