“Uzbekistan GTL” zavodida joriy yil iyun oyidan mintaqada birinchi sintetik suyuq mahsulotlarni ishlab chiqarish yo`lga qo`yildi.
"O`zbekneftgaz" AJ Matbuot xizmatining ma`lum qilishicha, joriy yil iyul oyidan boshlab ichki iste`molchilarga yuqori sifatli, K-6 ekologik sinfiga mansub, Evro 6 talablariga to`liq javob beradigan sintetik dizel yonilg`isi O`zbekiston Respublikasi tovar xom-ashyo birjasi orqali realizasiya qilinmoqda. Bugungi kunga qadar birja savdolari orqali iste`molchilarga 35,0 ming tonnadan ortiq sintetik dizel yonilg`isi 1 tonnasi 15,5 mln so`mdan 18,9 mln so`mgacha sotildi va o`z vaqtida etkazib berildi.
Sintetik dizel yoqilg`isi “Navoiy kon-metallurgiya kombinati” AJ, “Olmaliq kon-metallurgiya kombinati” AJ, “Navoiyuran” DK, “O`zbekiston temir yo`llari” AJ, “Ohangaronsement” AJ, respublikadagi barcha neft bazalar, yirik agroklasterlar, qurilish tashkilotlari va bir qator xususiy tadbirkorlar tomonidan doimiy ravishda xarid qilinmoqda va iste`molchilar tomonidan yuqori baholanmoqda.
“Uzbekistan GTL” zavodida sinov rejimidan to`liq ish rejimiga o`tish ishlari boshlanganligi sababli mahsulot ishlab chiqarish xajmlari bosqichma-bosqich ortmoqda. Joriy yil iyun oyida bir kunda 800,0 tonna sintetik dizel ishlab chiqarilgan bo`lsa, sentyabr oyida ushbu ko`rsatkich 1 400,0 tonnagacha ortishi kutilmoqda. Ishlab chiqarish hajmlarini oshirish orqali mahsulot tannarxini kamaytirilishiga erishilmoqda.
Mahsulot ishlab chiqarish hajmlari ortishi respublikamiz yoqilg`i mustaqilligiga yana bir katta qadam sifatida e`tirof etishimiz mumkin.
“Uzbekistan GTL” zavodining asosiy maqsadlaridan biri bo`lgan respublika ichki iste`molchilariga yuqori sifatli dizel yonilg`isini past narxlarda etkazib berishni ta`minlash maqsadida, O`zbekiston Respublikasi mustaqilligining 31 yilligi bayrami arafasida joriy yil 29 avgustdan boshlab O`zRTXB orqali sotuvga chiqariladigan sintetik dizel yonilg`isini 1 tonnasi boshlang`ich narxi 14 504 378 so`mgacha arzonlashtirilishi belgilandi.
Kelgusida zavod tomonidan ishlab chiqariladigan mahsulot hajmlari ortishi natijasida ularning tannarxi va mos ravishda birja savdolariga qo`yiladigan boshlang`ich narxlari ham bosqichma-bosqich pasayib borishiga erishiladi.
