2022 yil 21 iyul kuni Farg`ona viloyati O`zbekiston tumanida baxtsiz hodisa sodir bo`lib, uning oqibatida 23-sonli davlat maktabgacha ta`lim tashkilotining 4 yoshli tarbiyalanuvchisi vafot etgan.
Maktabgacha ta`lim vazirligi axborot xizmatiga ko`ra, mazkur ma`lumot Maktabgacha ta`lim vazirligiga kelib tushishi bilanoq, barcha holatlarga oydinlik kiritish maqsadida kompleks tekshirish ishlari boshlangan. Tekshiruv davomida ushbu tashkilot xodimlari kasbiy faoliyati jarayonida qo`pol qoidabuzarliklarga yo`l qo`ygani aniqlangan. Ular bolalar bog`cha hududidan ruxsatsiz chiqib ketishiga beparvo qaragan.
Baxtsiz hodisa sodir bo`lgan kun soat taxminan 08:30 larda tarbiyalanuvchini katta opasi 23-sonli DMTT tarbiyalovchilari ixtiyoriga olib kelgan. Oradan ma`lum vaqt o`tgach, mazkur maktabgacha ta`lim tashkiloti tarbiyachilari va rahbari beparvo, loqayd munosabati oqibatida tarbiyalanuvchi MTT hududidan ruxsatsiz chiqib, opasi orqasidan yugurgan. Harakat oqibatida baxtsiz tasodif bilan sirpanib, uyi yaqinidan oqib o`tuvchi Sobirjon daryosiga yiqilib tushgan va natijada cho`kib ketgan.
Maktabgacha ta`lim vazirligi ishchi guruhi tomonidan o`tkazilgan tekshirish jarayonida bola bog`cha hududidan bir necha bor ruxsatsiz chiqib ketgani, biroq bog`cha xodimlari buni yuqori idoralardan yashirib, bundan hech qanday xulosa chiqarmagani ma`lum bo`ldi.
Yuqoridagi holatlar inobatga olinib, tashkilot pedagoglari va rahbari ehtiyotsizligi hamda loqayd munosabati bola o`limiga sabab bo`lgani, ushbu maktabgacha ta`lim muassasasi rahbari faoliyatini tashkil etishda bir qator boshqa huquqbuzarliklar aniqlangan va barcha materiallar huquqni muhofaza qilish organlariga yuborilgan.
Huquqni muhofaza qilish organlari tomonidan ushbu maktabgacha ta`lim tashkiloti barcha mansabdor shaxslari va xodimlariga nisbatan JK 167-modda 2-qismi “g” bandi va 116-modda 3-qismi bilan jinoyat ishi qo`zg`atilgan.
