O`zbekistondagi Haydar Aliyev nomidagi Ozarbayjon Madaniyat Markazida "Ipak yo`lining durdonasi" XIV Toshkent Xalqaro kinofestivali doirasida Toshkent va Buxoro shaharlarida bo`lib o`tadigan "Ozarbayjon kinosi kunlari"ning ochilishi bo`lib o`tdi.
Kinematografiya agentligi, Ozarbayjon Madaniyat Vazirligi va Ozarbayjon Madaniyat Markazining tashabbusi bilan o`tkazilgan tadbirda ishtirokchilar dastlab markazdagi Haydar Aliyev haykali poyiga va shahidlar bog`iga guldastalar qo`ydilar.
Tadbirning ochilish marosimi avvalida Armaniston bilan Ozarbayjon chegarasida sodir bo`lgan provokasiya natijasida so`nggi kunlarda halok bo`lgan shahidlar xotirasi bir daqiqalik sukut bilan yodga olindi.
Tadbirda so`z olgan Xalq artisti Gulyanog Mammadova O`zbekiston Xalq artisti unvoni bilan taqdirlangani uchun O`zbekiston xalqiga va Davlat rahbari Shavkat Mirziyoevga minnatdorchilik bildirib, Festival ishiga muvaffaqiyatlar tiladi.
Tadbirda filmlar namoyishi ham bo`lib o`tdi. Kinorejissyorlar Ayoz Salayevning "Er" va Ilgar Najafning "Sug`ra va uning o`g`illari" filmlari namoyish etildi. Ikki rejissyor ham o`zlari yaratgan filmlari haqida ma`lumot berishdi.
Har ikki film ham festivalga tashrif buyurganlar orasida katta qiziqish uyg`otdi va rejissyorlar tadbir ishtirokchilarining olqishlariga sazovor bo`ldi.
Ma`lumot uchun, Xalqaro kinofestivalning davomi sifatida filmlar 17 sentyabr kuni Buxoro shahrida namoyish etiladi.
Oybek Shukurov, muxbir