OFK kalendariga muvofiq, sentyabr oyidagi milliy terma jamoalar uchun belgilangan FIFA kunlarida O`zbekiston milliy terma jamoasi Koreya Respublikasida o`quv-mashg`ulot yig`ini o`tkazishni rejalashtirgan.
Ushbu yig`in davomida vakillarimiz 2022-yilgi Jahon chempionati ishtirokchilari — Kamerun va Kosta-Rika milliy terma jamoalari bilan o`rtoqlik uchrashuvlarida maydonga tushadi. Mazkur bahslar 23 va 27-sentyabr kunlari bo`lib o`tadi.
Jamoa yig`inga ketishi oldidan bosh murabbiy Srechko Katanes ishtirokida matbuot anjumani o`tkazildi.
- Bu o`yindan qanday natija kutyapsiz?
- Bu — o`rtoqlik o`yini. Chempionatdagi futbolchilar va legionerlarni ko`rib olishim kerak. Raqiblar ham mundial oldidan barcha futbolchilarini tekshirib olishadi. Qo`rqmayapmiz. Maqsad — Osiyo Kubogi-2023ga yaxshi formada etib borish.
Superligadagi o`yinlarini kuzatyapman. Futbolchilar juda kam gol urishmoqda. Bu muammo meni tashvishlantirmoqda. Etakchi jamoalar atigi 30taga yaqin gol urishgan.
Haligacha futbolchilarni kuzataman. Men chaqirgan o`yinchilar zamonaviy futbol o`ynash uchun etarli xususiyatlarga ega. Jahon chempionatida qatnashadigan jamoalarga qarshi o`yinlarga har kimni ham chaqira olmaymiz.
Oston O`runov va Shahboz Umarovni kelajakda foyda keltirishiga ishonaman.
- Nega terma jamoaga chaqirilgan futbolchilar ro`yxatida Jamshid Iskanderov va Jamshid Boltaboev yo`q?
- Siz Kamerun milliy jamoasi o`yinlarini kuzatdingizmi? Bunday jamoalarga qarshi bahsga Iskanderov mos kelmaydi. Superliga boshqa daraja, Kamerun esa boshqa. Ularning eng bo`yi past futbolchilari — 180sm. Noyabrdagi yig`inda boshqalarga ham imkoniyat beramiz.
Siz jurnalist sifatida nega kam o`ynayotgan Eldor Shomurodovni chaqirayotganimni so`rashingiz mumkin. Lekin Shoma o`ynamasa ham, chaqiraveraman. Mening javobim — Kamerun va Kosta-Rikadek jamoalarga qarshi bahsga men bilan bir yil davomida ishlamagan futbolchilarni jalb qilish noto`g`ri.
- Siz milliy terma jamoada ish boshlaganingizga bir yil bo`ldi. Bu vaqt ichida nimalarni o`zgartira oldim deb aytolasiz?
- Bunga baho berish sizlarning ishingiz. O`zimga baho bera olmayman. Natija tomondan qarasak, ko`nglim to`lyapti. Tailanddek yaxshi jamoani yirik hisobda mag`lub eta oldik. Osiyoda bunday jamoalarga ko`p gol urish oson emas. Yaxshilandik, deb ayta olaman.
Avvalroq O`zbekiston MTJ 23 sentyabr kuni Kamerun, 27 sentyabr kuni Kosta-Rika terma jamoalariga qarshi o`rtoqlik uchrashuvini o`tkazishi haqida xabar bergan edik.
Ma`lumot uchun ayni dam FIFA reytingida O`zbekiston MTJ 77 o`rinni, Kamerun 38 o`rinni, Kosta-Rika 34 o`rinni eggalab turibdi.
Oybek Shukurov
