O`zbekiston futbol assosiasiyasida Turkiyada bo`lib o`tgan Jahon Chempionatida muvaffaqiyatli ishtirok etib, 3-o`rinni qo`lga kiritgan O`zbekiston amputantlar terma jamoasi bilan uchrashuv bo`lib o`tdi.
Uchrashuvda Sportni rivojlantirish vaziri o`rinbosari Shahrullo Mahmudov jamoaning mundialda qayd etgan natijalariga to`xtalib, musobaqa davomida jamoamiz Kolumbiya, Italiya, Ispaniya kabi jamoalarni mag`lub etilganini alohida ta`kidlab o`tdi.
Shuningdek, Sportni rivojlantirish vazirining maslahatchisi Avaz Karimov jamoaning ko`rsatgan o`yini tahsinga sazovor ekanligini aytib, futbolchilarni samimiy tabrikladi.
Bundan tashqari, O`FA birinchi vise-prezidenti faoliyatini murabbiy sifatida davom ettirish istagida bo`lgan terma jamoa vakillariga O`FA tomonidan murabbiylik kurslarida bepul o`qish imkoniyati taqdim etilishi ma`lum qilindi.
Uchrashuv yakunida O`zbekiston amputanlar terma jamoasining 3 nafar faxriy a`zosiga "O`zbek futboli rivojiga qo`shgan hissasi uchun" ko`krak nishoni taqdim etildi. Tadbir yakunida terma jamoaning barcha a`zolari O`FA belgisi va pul mukofotlari bilan taqdirlandilar.
Oybek Shukurov