Viloyatda "Kinokarvon" tadbirlari bo`lib o`tdi.
23-29 oktyabr kunlari Namangan viloyatida 200 ga yaqin ma`naviyat targ`ibotchilari, shoirlar, yozuvchilar, estrada xonandalari, taniqli sanatkorlar va o`z navbatida 30 dan ortiq Kinematografiya agentligi vakillari va kinoijodkorlar namanganliklar bilan muloqotlar va ijodiy uchrashuvlar o`tkazishdi.
Tadbirlar davomida O`zbekiston xalq artistlari Dilorom Karimova, Muhammadsoli Yusupov, O`zbekistonda xizmat ko`rsatgan artistlar Abduhalil Mignorov, Matyoqub Matchonov, Gulchehra Sa`dullaeva, Anvar Azimov, Alisher Otaboev, O`zbekistonda xizmat ko`rsatgan madaniyat xodimi, kinorejissyor va aktyor Hilol Nasimov, shuningdek, Mukarrama Bekmurodova, Xurshid To`xtaev, Dilshodbek Kattabekov, Ma`ruf Otajonov, Hushnud Sayfuddinov, Otabek Haqberdiev, Farhod Xudoyberdiev, Ulug`bek Yunusov, Bobur Arslonov, Fotih Nasimov, Akmal Nazarov, Zuxriddin Rejametov kabi aktyorlar ishtirokida ijodiy uchrashuvlar ham tashkil etildi.
Shu bilan birga, “Kinokarvon” tadbirlari doirasida Namangan viloyatining barcha hududlarida “Muhabbat bahori”, “Ayol qalbi”, “Bir kunlik to`y”, “101 reys”, “Meros”, “Puling bo`lsa”, “Ayol qismati”, “Baron 2. Sog`inch” va “Vatan ostonasida” kabi 15 dan ortiq badiiy va hujjatli filmlarning namoyishlari o`tkazilib, milliy filmlar namoyishi yuqori saviyada tashkil etildi.
“Namangan viloyatidan ajoyib, o`ziga xos taassurotlar bilan qaytyapmiz. Biz san`atkorlar vodiyga har safar boshqacha ishtiyoq bilan tashrif buyuramiz. Bu erda hammaning ko`ngli san`atga oshufta, ijodni sevishadi. Mamlakat bo`ylab kinotarg`ibot o`tkazayotgan “Kinokarvon” jamoasi 23-29 oktyabr kunlari Namanganda ijodiy uchrashuvlar va yangi filmlar namoyishini o`tkazdi. Ushbu voqeliklarda men ham bevosita ishtirok etganimdan juda va juda mamnunman. Shuni alohida ta`kidlash joizki, hududlarda tashkil etilgan ijodiy kechalar, tadbirlar va bayram dasturlari chinakamiga “Yangi O`zbekistonda el aziz, inson aziz” shioriga hamohang tarzda o`tdi. O`ylaymanki, bunday tadbirlar davomiy bo`ladi va biz san`atkorlarni xalqimizga yanada yaqinlashtiradi.” – deya o`z fikrlarini bildirdi aktyor Dilshod Kattabekov.
“Yangi O`zbekistonda el aziz, inson aziz” shiori ostida tashkil etilgan tadbirlarning oxirgi kunida viloyat hokimligi tomonidan bayramona katta tadbir tashkil etildi va targ`ibot ishlarida faol ishtirok etgan targ`ibotchilarga tashakkurnomalar topshirildi.
“Avvalambor shuni aytishim kerakki, “Yangi O`zbekistonda el aziz, inson aziz” shiori ostida Namangan viloyatida o`tkazilgan madaniy-ma`rifiy tadbirlar aholi vakillariga ko`tarinki kayfiyat baxsh eta oldi. Namanganliklar o`ziga xos ma`naviy ozuqa bera oladigan filmlar namoyishidan mamnun ekanliklarini bildirganlari ham quvonarlidir.
Bilasizmi, namoyish etilgan filmlar va taniqli kinoijodkorlar bilan muloqotlar menga juda ham manzur keldi. Prezidentimizga mana shunday tashabbusni ilgari surganlari uchun minnatdorligimni bildirib qolaman. Shu bilan birga Kinematografiya agentligiga ham tashakkur deyman. Namoyish etilgan filmlarning barchasi menga juda yoqdi. Bunday filmlar vatanimizning qadriga etib, tinchligimiz eng katta boyligimiz ekanligini hamisha his qilib yashashga undaydi. Ogohlik davr talabi bo`lib turgan bir paytda bunday filmlar har qanday kishini sergak tortishga va ogoh bo`lishga chorlaydi.
Viloyatimiz tumanlarida “Kinokarvon” tadbirlari yana tashkil etishlishini kutib qolamiz!” – deya fikr bildirdi Namangan viloyati, To`raqo`rg`on tumani hokimi Ahror Mansurov.
Ma`lumot uchun, “Yangi O`zbekistonda el aziz, inson aziz” shiori ostida tashkil etilgan tadbirlar joriy yilda Qoraqalpog`iston respublikasi, Qashqadaryo, Surxondaryo, Sirdaryo va Farg`ona kabi qator viloyatlarda ham tashkil etilgan edi. Yil yakuniga qadar yana bir qator hududlarda ijodiy safarlar tashkil etilishi rejalashtirilgan.
