Xalqaro tadqiqotchilar guruhi tomonidan olib borilgan izlanishlar natijasida yosh bilan bog`liq makulyar degenerasiya ko`z xastaligi xavfini kamaytirish yo`li topildi. Bu haqda Sog`liqni saqlash vazirligi Matbuot xizmati xabar bermoqda.
Tajriba sinovlari shuni ko`rsatdiki, organizmda xolesterin moddasining yuqori darajasini davolash yoki qandli diabetning ikkinchi tipini nazorat qilishga mo`ljallangan dori-darmonlarni muntazam iste`mol qilish orqali bu dardga chalinish ehtimolini pasaytirish mumkin.
Tadqiqotga 50 yoshdan oshgan kishilar jalb etildi. Ular to`rt toifa, ya`ni tanasida xolesterin darajasini pasaytirish, diabetni nazorat qilish, yallig`lanishlarni bartaraf etish yoki tayanch-harakat tizimi xastaliklarini davolash maqsadida dorilar qabul qilayotgan bemorlar orasidan saralab olindi.
Yakunda xolesterin yoki diabetga qarshi qo`llanilgan preparatlar yosh bilan bog`liq makulyar degenerasiyaga chalinish xavfini 22 foizgacha kamaytirishi mumkinligi ma`lum bo`ldi.