Terrorizmni moliyalashtirgan shaxs 10 yil muddatga ozodlikdan mahrum etildi. Bu haqda "darakchi.uz"ga DXX matbuot xizmati xabar qildi.
Ma`lum qilinishicha, 1993 yilda Toshkent shahrida tug`ilgan fuqaro 2014 yilda o`qish vizasi bilan Koreya Respublikasiga boradi va keyinchalik turli zavodlarda ishlaydi. 2018 yilning o`rtalarida esa internet tarmog`i orqali xalqaro terroristik tashkilotlar va diniy ekstremistik oqimlar g`oyaviy rahnamolarining “hijrat”, “jihod”, “shahidlik” to`g`risidagi audio-video ma`ruzalarini tinglab, ularga xayrihohlik bildiradi hamda aqidaparastlik mazmunidagi materiallarni atrofdagilarga tarqata boshlaydi. 2020 yilda u O`zbekistonga qaytganidan keyin ham noqonuniy harakatlarini davom ettiradi.
Hatto “Tavhid va jihod katibasi” terroristik tashkiloti a`zolarining virtual da`vatlari ta`sirida, yaqinlaridan yashirincha Suriyaga ketmoqchi bo`ladi. Lekin, maqsadi amalga oshmagach, jangarilarni moliyaviy qo`llab-quvvatlashni reja qiladi.
Shu tariqa u 2021-2022 yillar davomida o`zi va boshqa maslakdoshlarining jami 24 mln. 222 ming so`m miqdoridagi mablag`larini "moliyaviy jihod" sifatida xalqaro pul o`tkazmalari va elektron ilovalar orqali Suriyadagi jangarilarga yuboradi. Davlat xavfsizlik xizmati va Ichki ishlar vazirligi xodimlari tomonidan olib borilgan tezkor-qidiruv tadbirlari natijasida mazkur shaxsning noqonuniy harakatlariga chek qo`yildi.
Jinoyat ishlari bo`yicha Sergeli tuman sudi tomonidan uning qilmishlariga huquqiy baho berildi. U Jinoyat Kodeksining 2441, 2442 va 1553-moddalarida nazarda tutilgan jinoyatlarni sodir etganlikda aybli deb topilib, 10 yil 1 oy muddatga ozodlikdan mahrum qilindi.
