Qo`qon shahrida joylashgan “Buyuk allomalar” muzeyida O`zbekiston madaniy merosini o`rganish, saqlash va ommalashtirish bo`yicha Butunjahon jamiyatining “Qo`qon davlat muzey-qo`riqxonasi to`plami” kitob-albomi taqdimoti bo`lib o`tdi.
Nashrda Farg`ona vodiysidagi eng qadimiy madaniyat muassasalaridan birida saqlanayotgan san`at asarlari namunalari taqdim etilgan. Kitob-albom sahifalarida arxeologiya fondi yodgorliklari, numizmatika namunalari, qo`lyozma asarlar va hujjatli filmlar fondi haqida hikoya qilinadi. Saralab olingan namunalarda yog`och o`ymakorligi va ganch san`ati, zargarlik, kulolchilik, badiiy to`qimachilik san`ati o`z ifodasini topgan. Tasviriy san`at to`plamiga alohida bo`lim bag`ishlangan.
Muzey rahbari to`plam haqidagi kitob nashr etishda ko`rsatgan yordami uchun Butunjahon jamiyatiga o`z minnatdorchiligini bildirdi.
“Biz uzoq vaqtdan beri Qo`qon davlat muzey-qo`riqxonasiga bag`ishlangan kitob nashr etish imkoniyatini izlayotgan edik. Butunjahon jamiyati ko`magi natijasida muzeyning noyob madaniy merosiga bag`ishlangan jild “O`zbekiston madaniy merosi jahon to`plamlarida” turkumi doirasida nashrdan chiqdi. Bugun biz o`z mehnatimiz natijasini taqdim etayotganimizdan xursandmiz”, — dedi Manzura Mansurova.
Kitob-albomni “O`zbekiston madaniy merosi jahon to`plamlarida” loyihasi ilmiy koordinatori Elmira Gyul va “Qo`qon davlat muzey-qo`riqxonasi to`plami” loyiihasi kuratori Shahlo Abdullaeva taqdim etdi. Tadbir doirasida mehmonlar uchun “O`zbekiston madaniy merosi jahon to`plamlarida” turkumiga oid 50 ta kitob-albomlardan iborat ko`rgazma ham tashkil etildi.