12–13 dekabr kunlari Toshkentda Mustaqil Davlatlar Hamdo`stligi ijodiy va ilmiy ziyolilarining XV forumi bo`lib o`tdi. Anjumanda Bosh vazir o`rinbosari – Turizm va madaniy meros vaziri Aziz Abduhakimov, Madaniyat vaziri Ozodbek Nazarbekov, mahalliy va xorijiy oliy o`quv yurtlari rahbarlari, chet ellik soha mutaxassislari hamda mahalliy va xorijiy ommaviy axborot vositalari xodimlari ishtirok etdi.
"Gumanitar hamkorlik: 30 yillik tajriba va rivojlanish istiqbollari" mavzusiga bag`ishlangan forumda rivojlanish va o`zaro hamkorlikni mustahkamlash masalalari muhokama qilindi.
Shuningdek, forum doirasida Alisher Navoiy nomidagi O`zbekiston davlat akademik katta teatrida MDH Yoshlar simfonik orkestrining konsert dasturi bo`lib o`tdi.
Forum davomida har yili fan va ta`lim, madaniyat va san`at, gumanitar yo`nalishda samarali faoliyat olib borib, Hamdo`stlik rivojiga munosib hissa qo`shayotganlar alohida e`tirof etildi. Xususan, joriy yilda O`zbekiston, Ozarbayjon, Armaniston, Rossiya, Tojikiston, Belarus, Qozog`iston, Moldova, Qirg`iziston vakillari “Hamdo`stlik yulduzlari” va “Hamdo`stlik debyutlari” xalqaro mukofotlari bilan taqdirlandi.
Quvonarlisi, O`zbekiston xalq artisti Ramiz Usmonov va “Profi Solushns” kompaniyasi arxitektor-dizayneri Ikrom Haydarov ham e`tirof etilganlar qatoridan o`rin oldi.
Anjuman davomida MDH davlatlaridan kelgan 200 dan ortiq soha mutaxassislari va mahalliy mutaxassislar o`rtasida fan, ta`lim, sport, turizm va boshqa sohalardagi rivojlanish borasida fikr almashildi, yoshlarning jamiyat hayotidagi o`rnini yanada mustahkamlash va boshqa dolzarb masalalar bo`yicha taklif va tashabbuslar ilgari surildi. Shuningdek, sohalarni rivojlantirish uchun qilinajak ishlar yuzasidan qator kelishuvlarga erishildi.