“Tashkent Indeks”dan talabalar o`z xohishiga ko`ra, ko`chirilmoqda, ammo ular majburan ko`chirilmagan, deya xabar bermoqda Oliy ta`lim, fan va innovasiyalar vazirligi matbuot xizmati.
Vazirlikka ko`ra, joriy o`quv yili boshida “Tashkent Indeks” savdo majmuasida talabalar vaqtincha turishlari uchun sharoit yaratilgan.
“O`tgan davr mobaynida aksariyat oliy ta`lim muassasalari tomonidan talabalar turar joylarida qo`shimcha yotoq o`rinlari yaratilib, ko`chish istagini bildirgan talabalar ko`chirib o`tkazilgan.
Shu kunlarda esa sovuq havo haroratida majmua etarli sharoitga ega emasligi bois, ko`chirish ishlari oliy o`quv yurtlari talabalar turar joylarida ko`proq qo`shimcha bo`sh o`rinlari yaratilishi, aksariyatida yangi yotoqxonalar barpo etilishi hisobiga yanada jadallashdi.
Bunda “Tashkent Indeks”da qolishni xohlovchi talabalarni majburan chiqarib yuborilishiga yo`l qo`yilmaydi”, deyiladi munosabatda.
Ma`lumot o`rnida, birgina Toshkent davlat iqtisodiyot universitetida ikki qavatli yotoq o`rni tashkil etish hisobiga qo`shimcha 139 o`rinli, Toshkent davlat pedagogika universiteti tomonidan Oqtepa pedagogika kolleji talabalar turar joyida yangi 300 o`rinli joy yaratilgan.
Bundan tashqari, Toshkent davlat stomatologiya institutida 400 o`ringa mo`ljallangan yangi yotoqxona qurib, foydalanishga topshirildi.
