Bugun, 27 yanvar kuni Human.uz sayti direktori Xurshid Daliev, sayt bosh muharriri Muslim Mirzajonov va saytning boshqa xodimlari — jami etti kishi nashrning Toshkent davlat agrar universiteti hududida joylashgan ofisidan olib ketilgan. Bu haqda saytning telegramdagi kanilda xabar qilindi.
Ma`lum qilinishicha, noma`lum “organ xodimlari” tomonidan ofisdagi eshiklar buzib kirilgan va barcha ma`lumotlar, qurilmalar tintuv qilingan.
"Tahririyat ushbu holatni O`zbekiston Prezidenti siyosatiga mutlaqo zid va so`z erkinligiga tahdid deb hisoblaydi", deyiladi rasmiy telgarm kanalida.
Bir muddat o`tib, sayt ofisi Bosh prokuratura huzuridagi Iqtisodiy jinoyatlarga qarshi kurashish departamenti Quyi Chirchiq tumani bo`limi surishtiruvchisi E. Ablamurodov imzosi bilan muhrlangani ma`lum qilindi.
Kun.uz’ning huquqni muhofaza qiluvchi organlardagi manbasi tayanib xabar qilishicha, sayt mas`ullariga nisbatan jinoyat ishi qo`zg`atilgan va sayt mas`ullaridan tashqari davlat tashkilotlarida ishlovchi boshqa shaxslar ham prosessual tartibda ushlangan.
Ayni paytda Respublikadagi biror rasmiy idora tomonidan holat bo`yicha biror rasmiy munosabat bildirilmadi. Faqat Milliy mass-mediani qo`llab-quvvatlash va rivojlantirish jamoat fondi vaziyatdan xavotirdaligini bildirgan.
"Huquq-tartibot idoralari tomonidan ushbu masala bo`yicha izoh berilishini kutamiz hamda jurnalistlar xavfsizligi, shunindek, ularning professional faoliyatiga qonuniy munosabatda bo`linishi ta`minlanishini so`raymiz", - deyiladi fond munosabatida.
Ayni paytga qadar olib ketilganlarning hech biri bilan aloqaga chiqishning iloji bo`lmayapti.
